कसैको यादमा तड्पी बसेको आज धेरै भो
नुनिला मोतीका दाना खसेको आज धेरै भो ।
पिलायौ प्रितको प्याला मिलायौ नौनीमा आगो,
दिलैमा प्रेमको जादु पसेको आज धेरै भो ।
बनायौ नाग त्यो चुल्ठो डरायौ जिन्दगी मेरो,
सताई निदमा आई डसेको आज धेरै भो ।
फकायौ जालमा पार्यौ, डुलायौ स्वप्न लोकैमा,
छुपाई छातीमा छुरी धसेको आज धेरै भो ।
म कसको आसमा बाँचूँ कि डुबूँ कालीमा आजै,
गलामा प्रेमको पासो कसेको आज धेरै भो ।