१४ भदौं, काठमाडौं । काठमाडौंको भृकुटीमण्डपमा आजदेखि नाडा अटो-शो सुरु भएको छ । नेपाल अटोमोबाइल्स डिलर्स एसोसिएशनको आयोजनामा अटो मेला भएको हो ।
विभिन्न ३६ वटा ब्राण्डले सहभागिता जनाएको मेलाको उदघाटन अर्थमन्त्री कृष्णबहादुर महराले गरेका छन् । विभिन्न चार पांग्रे, दुई पांग्रे र व्यवसायिक सवारी उत्पादक तथा वितरक कम्पनीहरुले मेलामा आफ्नो उत्पादनको प्रवर्द्धन गरिरहेका छन् ।
दशैंतिहारको अवसरमा गाडी किन्ने योजनामा रहेकाहरुको मेलामा बाक्लो उपस्थिति छ । यस्तै आगामी दिनमा सवारी किन्ने योजना बनाउनेहरु पनि मेलाको अवलोकनका लागि पुगेका छन् ।
मेलाको अवसरमा नेपाल भित्रिएका नयाँ ब्राण्ड रेनल्टसहित विभिन्न कम्पनीले आफ्नो उत्पादनबारे नेपाली ग्राहकलाई विश्वस्त पार्ने कोसिस गरिरहेका छन् । मेलाले विशेषगरी युवा पुस्तालाई आकषिर्त गरेको देखिन्छ । विभिन्न कम्पनीले मेला तथा दशैंतिहारका लागि विभिन्न छुट, नगद पुरस्कार र उपहार योजना ल्याएका छन् ।
त्यसैले पनि मेलालाई अवसरका रुपमा सदुपयोग गर्दै सवारीबारे जानकारी लिने र बुकिङ गर्नेहहरु भृकुटीमण्डपमा पुगेका छन् । एउटै थलोमा नेपालमा उपलब्ध अधिाकंश ब्राण्डहरुले आफ्नो उत्पादनबारे जानकारी दिइरहेकाले नयाँ सवारी किन्नेहरुलाई ‘कम्पेयर’ गरेर सवारी किन्न सजिलो छ ।
मेलामा पेसेन्जर भेहिकलमा मात्र नभएर कमर्सियल भहिकलहरुबारे जानकारी लिनहरुको पनि बाक्लो उपस्थिति देखिन्छ । मेलामा गाडी हेर्ने, छान्ने, बुकिङ गर्नेहरुको ठूलो भीड छ । आयोजक अटोेमोबाइल डिलर्स एसोशिएशनका अध्यक्ष अञ्जन श्रेष्ठ यो सवारी विक्रेता र क्रेताहरुको कुम्भ मेला नभएको बताउँछन् । एउटै थलोमा सवारीहरु दाँजेर किन्न पाइने भएकाले ग्राहकलाई ‘कन्फ्युजन’ नहुने उनको भनाइ छ ।
आटो शोमा टाटा, मारुती-सुजुकी, डाट्सन, फियाट, फोर्ड, होण्डा, हुण्डाई, किया, महिन्द्रा, एमजी, निशान रेनल्ट, स्कोडा, सुजुकी, टाटा टोयोटा, भक्सवागन, स्याङयोगलगायत कम्पनीका गाडी मेलामा राखिएका छन् ।
बजाज, बेला, बेनली, हिरो, होण्डा केटीएम, महिन्द्रा, रोयल, इन्फिल्ड, रनर, स्कोमाडी, सुजुकी, टीभीएस, युएम, भेस्पा, यामा लगायतका कम्पनीका दुई पांग्रे सवारी पनि मेलामा छन् । अशोक ले-ल्याण्ड, आयसर, टाटा लगायतका कम्पनीका व्यवसायीक सवारी पनि मेलामा छन् ।
