१४ भदौ, काठमाडौं । काठमाडौंको भृकुटीमण्डपमा जारी नाडा अटो शोमा राखिएका स्टलहरुको भ्रमण गर्दा एउटा प्रश्न उब्जिन्छ- प्रदर्शनी गाडीहरुको हो कि युवतीको ? तर, यसमा द्विविधा मान्नु पर्दैन । किनकी प्रदर्शनी गाडीहरुकै भए पनि अवलोकनकर्तालाई आकर्षित गर्न कम्पनिहरुले सुन्दर युवतीहरुलाई पनि सँगै राखेका हुन् ।
कुनै पनि उत्पादनहरु सार्बजनिक गर्दा युवतीहरुमार्फत् गराउनु विश्वव्यापी प्रचलन जस्तै बनेको छ । विदेशीहरुको अनुसरण गर्दै नेपालमा पनि युवतीहरुमार्फत् गाडी, मोबाइल र कम्प्युटर सार्बजनिक गर्ने गरिएको छ ।
नाडा अटो शोमा बिभिन्न ३६ ब्राण्डका सवारी साधनहरुका स्टल छन् र त्यहाँका सबैजसो स्टलहरुमा छोटा पहिरनमा सजिएका युवतीहरु छन् । धेरैजसो नेपाली मोडलहरुलाई स्टलमा राखिए पनि केही विदेशी युवतीहरुलाई पनि देख्न सकिन्छ ।
मानिसहरुको भीड पनि युवतीहरु रहेको स्टलहरुमा बढी देखिन्थ्यो । एउटा स्टलमा ६ जनासम्म युवती राखिएका छन् र धेरैजसो गाडीको रंगसँग मिल्ने पहिरनमा देखिन्छन् ।
दैनिक ३० हजारसम्म आम्दानी
कम्पनीहरुलाई मोडलिङ क्षेत्रमा क्रियाशील एजेन्सीहरुले मोडल उपलब्ध गराएका छन् । नाडा अटो शोमा मोडलहरु उपलब्ध गराउने चार-पाँच वटा एजेन्सी रहेका छन् ।
मोडलहरुका लागि गाडी कम्पनीहरुले दैनिक पाँच हजार रुपैयाँदेखि ३० हजार रुपैयाँसम्म तिर्ने गरेका छन् ।
एलएनएस मोडलिङ एजेन्सीका प्रवन्धक सुलभ श्रेष्ठले अनलाइनखबरसँग भने, ‘कम्पनीसँग सम्झौता गरेर हामीले मोडलहरु उपलब्ध गराएका छौं । कम्तिमा दैनिक ५ हजारदेखि ३० हजार रुपैयाँसम्म मोडलहरुले पाउँछन् ।’
पर्यटकका रुपमा नेपाल घुम्न आएका विदेशीहरुलाई प्रस्ताव गरेर र प्रदर्शनीमा ल्याइएको उनले बताए ।