मंगलबार, १३ असार, २०७४
OnlineKhabar.com

नेपाली पर्यटनले इन्डोनेसियाबाट सिक्नैपर्ने पाठ

रासस

अनलाइनखबर

indonesia's-bali
३० भदौ, जकार्ता (इन्डोनेसिया)। सत्र हजारभन्दा बढी सामुद्रिक टापुको देश इन्डोनेसिया विश्व पर्यटनको आकर्षक गन्तव्य बन्दै गएको छ ।

दक्षिण पूर्वी एसियाको पर्यटकीय गन्तव्यका रुपमा स्थापित इन्डोनेसियाले पर्यटकलाई आकर्षित गर्न हालै नेपालसहित १६९ मुलुकलाई अन एराइभल (आगमन) भिसा सुरु गरेको छ । आधारभूत भौतिक पूर्वाधार तथा वातावरणमैत्री संरचनामा उदाहरणीय इन्डोनेसियाले पछिल्लो समय नयाँ पर्यटकीय गन्तव्यका रुपमा थप समुद्री टापुको प्रवद्र्धन गर्ने योजना अगाडि बढाएको छ ।

चर्चित बाली, सुमात्रा, जाकर्ता आदि पर्यटनका लागि आकर्षक गन्तव्य हुन् । यसका अतिरिक्त अन्य टापुको पर्यटन प्रवद्र्धनमा इन्डोनेसिया लागिपरेको पर्यटनमन्त्री यारिफ यायाले बताए । विश्वभरका पर्यटन व्यवसायीले उच्च गुणस्तरीय पर्यटकीय सेवाका लागि पाटा ट्राभल मार्ट उपयुक्त माध्यम रहेको उनको भनाइ छ ।

पाटाको अवसर

आ–आफ्ना मुलुकका गन्तव्य प्रवद्र्धन गर्ने उद्देश्यले विश्वका पर्यटन व्यवसायी समुन्द्री टापुको पहिचान बोकेको मुलुक इन्डोनेसियाको राजधानी जाकर्तामा जमघट भएका छन् । पाटा ट्राभल मार्ट २०१६ ले उनीहरुलाई आफ्ना पर्यटकीय गन्तव्य प्रवद्र्धन गर्ने अवसर सिर्जना गरिदिएको हो । सत्र हजारभन्दा बढी समुन्द्री टापु भएको इन्डोनेसिया विश्व पर्यटनको आकर्षक गन्तव्य हो ।

सेप्टेम्बर ७ देखि ९ सम्म भएको पाटा ट्राभल मार्टको ३९औँ संस्करणमा नेपालसहित ६३ वटा मुलुकबाट एक हजार २८४ प्रतिनिधिको सहभागिता रहेको थियो । यसमध्ये १०० भन्दा बढी सञ्चारमाध्यमका प्रतिनिधि सहभागी मार्टमा नेपालबाट छवटा सञ्चारमाध्यमका प्रतिनिधित्व रहेको आयोजकले जनाएका छन् ।

दिगो विकासका लागि पर्यटनको अवधारणालाई आधार मानेर आयोजना गरिएको यो मेला विश्वकै चर्चित मेलामध्येको हो । इन्डोनेसियाको अन्तर्राष्ट्रिय प्रदर्शनी केन्द्रमा एक समारोहबीच मार्ट उद्घाटन गर्दै यहाँका उपराष्ट्रपति मोहम्मद जुसुफ कालाले पर्यटनकै ठूलो मार्ट आफ्नो देशमा आयोजना हुनु गर्वको विषय भएको उल्लेख गर्दै यसले विश्व पर्यटन बजरलाई प्रवद्र्धन गर्न सहयोग पुग्ने विश्वास व्यक्त गरे ।

इन्डोनेसियाका पर्यटनमन्त्री यारिफ यायाले विश्वका प्रमुख मेलामध्ये पाचौँ स्थानमा पर्ने पाटा ट्राभल मार्ट आफ्नो मुलुकमा आयोजना गरिएकोमा खुसी व्यक्त गर्दै आफ्नो मुलुकले पर्यटन प्रवद्र्धनका लागि नयाँ गन्तव्यको विकास र पर्यटकीय पूर्वाधार निर्माणमा विशेष प्राथमिकता दिएको बताए। आफ्नो सेवा तथा गन्तव्यको प्रवद्र्धनमा विश्वभरका पर्यटन व्यवसायी तथा सङ्घसंस्थाले पाटा ट्राभल मार्टलाई उपयोग गर्र्दै आएका छन् । प्रकृति र संस्कृतिलाई पर्यटन समृद्धिका प्रमुख आधारका रुपमा लिएको इन्डोनेसियामा आदिवासी संस्कृति र परम्परागत रीतिरिवाजले विविधतामा एकता छाएको छ ।

जाकर्तामा नेपाली पर्यटन प्रवद्र्धन

जाकर्तामा सुरु भएको मार्टमा प्यासिफिक एसिया ट्राभल एसोसिएसन (पाटा) नेपाल च्याप्टर र नेपाल पर्यटन बोर्डको संयुक्त नेतृत्वमा नेपालबाट नेपाल वायुसेवा निगम, एक्सप्लोर हिमालय ट्राभल एन्ड एडभेन्चर, होटल मस्र्याङ्दी, हिमालयन गाइड नेपाल टे«क एन्ड एक्सपिडिसन, नेपाल इजी ट्राभल, लाङ्टाङरि ट्रेकिङ एन्ड एक्सपिडिसन, सोल्टी क्राउन प्लाजा र टाइगर ल्यान्ड सफारी रिसोर्ट सहभागी थिए ।

पर्यटकीय गन्तव्य खरिद गर्न विभिन्न २६० क्रेता र २२० वटा बिक्रेता सहभागी रहेको मार्टमा ताइवान, मकाउ, हङ्कङ, अफ्रिका, मलेसिया आदि मुलुक पनि सहभागी थिए । सन् १९९१ देखि विभिन्न मुलुकमा नियमितरुपमा आयोजना भइरहेको ट्राभल मार्टमा यस वर्ष नेपालबाट १० कम्पनी तथा संस्थाले भाग लिएका थिए ।

नेपालबाट ट्राभल मार्टमा प्रतिनिधित्व गरिरहेका नेपाली सङ्घसंस्था तथा कम्पनीका प्रतिनिधिले मार्ट नेपाली पर्यटकीय सेवा तथा गन्तव्यको प्रवद्र्धनका लागि उपयुक्त माध्यम भएको बताए ।

नेपाल पर्यटन बोर्डका प्रमुख कार्यकारी अधिकृत (सिइओ) दीपकराज जोशीले पर्यटन बजारको व्यावसायिक प्रवद्र्धन गर्न मार्ट उपयुक्त गन्तव्य भएको बताए । मार्टमा उच्चस्तरीय क्रेता र बिक्रेताको जमघट हुने भएकाले नेपालका लागि मार्ट उपयोगी हुने उहाँले उल्लेख गरे ।

पाटा नेपाल च्याप्टरका अध्यक्ष सुमन पाण्डेले अन्तर्राष्ट्रियस्तरको सेवाबारे जानकारी लिन र अन्य मुलुकको अनुभव आदानप्रदान गर्न मार्ट फलदायी हुने बताए । नेपाल वायुसेवा निगमका प्रवक्ता रामहरि शर्माले नेपाली पर्यटनलाई विश्वबजारमा प्रवद्र्धन गर्न मार्ट उपयुक्त थलो भएको उल्लेख गरे ।

पाटाका कार्यकारी अधिकृत सुरेशसिंह बुडालले अन्तर्राष्ट्रियस्तरमा क्रेता र बिक्रेताबीच व्यापार प्रवद्र्धन गर्ने महत्वपूर्ण थलो मार्टलाई नेपालले भरपुर उपयोग गर्नसकेको खण्डमा नेपाली पर्यटन प्रवद्र्धनमा टेवा पुग्ने बताए।

पाटा ट्राभल मार्टमा राखिएका विभिन्न मुलुकका पेभिलियनमध्ये नेपालको पेभिलियनमा दर्शकको आकर्षण देखिएको थियो । खासगरी परम्परागत प्यागोडा शैलीमा सजाइएको नेपाली पेभिलियनमा सगरमाथा, पशुपतिनाथ मन्दिरलगायत नेपाली पर्यटनका विविध उत्पादनलाई सजाइएको थियो । भूकम्पपछि नेपालको पर्यटनबारे मार्टमा सहभागी धेरैको चासो रहेको पाटाले जनाएको छ ।

२०७३ भदौ ३० गते ११:०३ मा प्रकाशित
अनलाइनखबर सिधै एपबाट खोल्नुहोस् । एन्ड्रोइडका लागि यहाँ र आइफोनका लागि यहाँ क्लिक गर्नुहोस् । तपाईं हामीसंग फेसबुक, ट्वीटरयुट्युव मार्फत् पनि जोडिन सक्नुहुन्छ ।

यसमा तपाइको मत




फेसबुकबाट तपाईको प्रतिक्रिया

सम्बन्धित शीर्षकहरु

Also you may like this