चीनको पहिलो अन्तरीक्ष स्टेशन तियांगोंग १ नियन्त्रणबाहिर गएको र यो आगामी सन् २०१७ मा पृथ्वीमा खस्ने अनुमान गरिएको छ ।
अन्तरीक्ष दौडमा अगाडि निस्किने कोसिस गरिरहेको चीनले सन् २०११ मा तियांगोंग १ प्रक्षेपण गरी अन्तरीक्षमा स्थापित गरेको थियो ।
चिनिया अन्तरीक्ष कार्यक्रमसँग सम्बद्ध अधिकारीहरुका अनुसार यो स्टेशनले आफ्नो ऐतिहासिक मिसन पूरा गरिसकेको छ ।
यद्यपि अन्तरीक्षमा रहेको यो प्रयोगशाला अहिलेपनि सुरक्षित रहेको र ३७० किलोमिटर माथि आफ्नो कक्षमा परिक्रमा गरिरहेको बताइएको छ ।
चीनको मानव अन्तरीक्ष इन्जिनियरिंग कार्यलयका उप निर्देशक उ पिंगले केही दिनअघि एक पत्रकार सम्मेलनमा भनेका थिएः हाम्रो गणना र विश्लेषण मुताविक यो अन्तरीक्ष प्रयोगशाला पृथ्वीमा खस्ने बेला यसको धेरैजसो भाग जल्नेछ ।
पृथ्वीमा खस्ने यो अन्तरीक्ष स्टेशनका कारण विमानको उडानमा असर पर्ने तथा पृथ्वीमा धनजनमा क्षति पुग्ने आशंका नरहेको उनको भनाइ छ ।
उता गार्जियनको समाचार अनुसार हार्वड विश्वविद्यालयका अन्तरीक्षशास्त्री डाक्टर जोनाथन म्याकडोभलले चीनको यो अन्तरीक्ष स्टेशनले आफ्नो नियन्त्रण गुमाइसकेको बताएका छन् ।
उनी भन्छन्, तपाइँ यी चिजहरुलाई आफ्नो अनुसार घुमाउन सक्नुहुन्न । जब यी पृथ्वीमा खस्न थाल्दछन् तब त्यसको दुइ दिनपहिले नै तपाइँलाई त्यहीँ कुरा थाहा हुन्छ जो खस्ने ६।७ घण्टा पहिला थाहा हुन्छ ।
उनका अनुसार पृथ्वीको कक्षमा आउँदा यहाँको वातावरणमा घर्षणका कारण अन्तरीक्ष स्टशनका धेरैजसो संरचनाहरु ऋाफै पग्लिनेछन् ।
स्मरण रहोस् यो महिनाको सुरुवातमा चीनले आफ्नो दोश्रो अन्तरीक्ष स्टेशन प्रक्षेपण गरिसकेको छ । जसको नाम तियांगोंग २ हो । आगामी २०२२ सम्म यो प्रयोगशाला अन्तरीक्षमा रहने बताइएको छ ।