११ असोज, चितवन । चितवन दाह्रेचोकको घोप्टेभिरमा दुर्घटनामा परेका पूर्वगृहमन्त्री माधवप्रसाद घिमिरेका गाडी चालक विष्णु राईलाई उपचारका लागि मंगलबार काठमाडौं पठाइएको छ ।
आइतबार घिमिरे र परिवारका सदस्य सवार गाडी घोप्टेभिरबाट त्रिशुली नदीमा खस्दा चालक राई घाइते भएका थिए ।पूर्वगृहमन्त्री घिमिरे र उनका दुई भाइ अझै वेपत्ता छन् भने आमासहित तीन जनाको घटनास्थलमै मृत्यु भएको थियो ।
चालक राईलाई मंगलबार नेपाली सेनाको हेलिकप्टरबाट काठमाडौं प्रहरी अस्पतालमा उपचारका लागि पठाइएको हो ।
उनको मिर्गौला र घाँटीमा रगत जमेकाले चितवनमा उपचार सम्भव नभएपछि काठमाडौं पठाइएको प्रमुख जिल्ला अधिकारी विनोदप्रकाश सिंहले जानकारी दिए ।
सोही हेलिकप्टरमा गृहमन्त्री विमलेन्द्र निधि, सुरक्षा निकायका प्रमुखहरु, चालक राईको श्रीमती र छोरासमेत काठमाडौं आएका छन् ।