७ कात्तिक, नेपालगञ्ज । सांसद गंगा चौधरी कैलालीबाट दाङ आउने क्रममा शनिबार साँझ सवारी दुर्घटनामा परी घाइते भएकी छिन् । उनको कोहलपुरस्थित टिचिङ अस्पतालमा उपचार भइरहेको छ ।
कैलालीमा पार्टीको बैठक सकेर दाङ फर्कने क्रममा शनिबार साँझ सवा ६ बजे उनी चढेको गाडी बाँकेको गावर भन्ने ठाउँमा पल्टेको थियो ।
उक्त दुर्घटनामा सांसद चौधरीसहित पाँच जना थिए । सांसद चौधरीको टाउकोमा सिसाले काटेर चोट लागेको छ । उनको अवस्था सामान्य रहेको पति नन्दकुमार चौधरीले अनलाइखबरलाई बताए ।
गाडीमा सवार रामपति चौधरीलाई बढी चोट लागेपनि अरुको अवस्था सामान्य रहेको नन्दकुमारले बताए ।
सडकमा ओइरो झरेर बनेको माटोको ढिस्कोमा ठोकिएर गाडी पल्टिएको थियो । आधा पल्टिएको अवस्थामा गाडी करिब ५० मिटर धसिएर बिपरीत दिशावाट आइरहेको हायस माइक्रोमा ठोकिएको थियो ।