७ कात्तिक, काठमाडौं । सभामुख ओनसरी घर्तीमगरले महाअभियोग प्रस्ताव अघि बढिसकेको भन्दै चलखेल असम्भव भएको बताएकी छन् ।
आइतबारको संसद बैठकले अख्तियार प्रमुख लोकमान सिंह कार्कीविरुद्ध दर्ता भएको महाअभियोग प्रस्तावमाथि छलफलका लागि मंगलबारको समय तोकेको छ ।
बैठकपछि सञ्चारकर्मीहरुसँग कुरा गर्दै सभामुख घर्तीले कांग्रेसले समय मागेको बताइन् । कांग्रेसले आफ्नो पार्टीको बैठक रहेको भन्दै दुई दिन कटाएर बैठक राख्न भनेको तर, नियमावली अनुसार नमिल्ने भएकाले भोलि अबेर बैठक राखेको उनले बताइन् ।
सभामुख घर्तीले संसदको प्रक्रिया अघि बढिसकेको भन्दै अब चलखेल सम्भव नभएको बताइन् । उनले भनिन्, ‘प्रस्तावकले नै प्रस्ताव फिर्ता लिनुभयो भने अर्कै कुरा हो ।’
संसदमा छलफलपछि महाअभियोग सिफारिस समितिले एक साताको समय पाउने भन्दै सभामुख घर्तीले एक महिनाभित्र संसदले निर्णय दिइसक्ने बताइन् ।
