१० कात्तिक, काठमाडौं । परराष्ट्रमन्त्री डा. प्रकाशशरण महत बुधबार नयाँदिल्ली प्रस्थान गरेका छन् । भारतको नयाँदिल्लीमा हुन गइरहेको नेपाल-भारत संयुक्त आयोगको मन्त्रीस्तरीय बैठकमा सहभागी हुन परराष्ट्रमन्त्री डा. महत त्यसतर्फ प्रस्थान गरेका हुन् ।
दिल्ली प्रस्थान गर्नुअघि त्रिभुवन अन्तराष्ट्रिय विमानस्थलमा पत्रकारहरुसँग कुरा गर्दै मन्त्री महतले राष्ट्रिय हित र स्वार्थका विभिन्न विषयमा भारतसँग कुरा राख्ने बताए ।
नयाँदिल्ली प्रस्थान गर्नुअघि मन्त्री डा. महतले भने, ‘नेपाल-भारत बीचका बिगतका विभिन्न सम्झौता र आयोजनाहरुको कार्यान्वयनको अवस्थाबारे बृहत समीक्षा हुन्छ र नेपालको तर्फबाट मैले राष्ट्रिय हित र स्वार्थका विभिन्न विषयमा कुरा राख्ने छु ।’
नेपाल-भारत संयक्त आयोगको बैठक बिहीबार भारतको नयाँदिल्लीमा हुनेछ । बैठकमा नेपालको नेतृत्व मन्त्री डा. महतले र भारतको नेतृत्व विदेशमन्त्री सुष्मा स्वराजले गर्नेछन् । साथै नेपाल र भारतका उच्च कूटनीतिक अधिकारीहरुको पनि बैठकमा उपस्थिति रहने छ ।
आयोगको मन्त्रीस्तरीय बैठकअघि सचिवस्तरीय बैठक भने बुधबारबाटै नयाँदिल्लीमा सुरु भइसकेको छ । सो बैठकमा सहभागी हुन परराष्ट्र सचिव शंकरदास बैरागी मंगलबार नै नयाँदिल्ली पुगेका थिए ।
सो बैठकमा नेपाल-भारतका बीचमा विगतमा भएका सम्झौता र आयोजनाहरुको कार्यान्वयनको अवस्थाबारेमा बृहत् समीक्षा हुनेछ ।
प्रधानमन्त्री पुष्पकमल दाहालको हालैको भारत भ्रमणका क्रममा तथा विगतदेखिकै नेपाल-भारतबीचका विभिन्न सहमति, सम्झौता तथा आयोजनाको कार्यान्वयनका बारेमा बृहत समीक्षा र कार्यान्वयनमा भएका ढिलाइका विषयमा पनि सो बैठकमा छलफल हुने छ ।
मन्त्री डा. महत आगामी शुक्रबार स्वदेश फर्किने छन् ।
