१० कात्तिक, काठमाडौं । थाइल्यान्डको बैंककमा भएको ३१ औं किङ्स कप विश्व च्याम्पियनसिपमा नेपाली सेपाकताक्रो टोलीले दुई पदक जितेको छ ।
नेपाल सेपाकताक्रो संघले आफनो विभिन्न कार्यक्रम सार्वजनिक गर्ने उद्देश्यले आयोजित पत्रकार सम्मेलनमा संघका अध्यक्ष नेत्रप्रसाद लिम्बूले नेपालले दुई कांस्य पदक जितेको जानकारी गराए ।
अक्टोबर १७ देखि २३ तारिखसम्म भएको च्याम्पियनसिपमा नेपाली टोलीले रेगु इभेन्ट र डबल इभेन्टमा कांस्य पदक जितेको हो । नेपाली टोलीबाट अनिल गुरुङको कप्तानीमा अनिल जर्घा मगर, एलन गुरुङ, राजु तामाङ, शैलेश दाहाल, रोशन तामाङ, सुजन डंगोल, मुकुन्द गौतम र रुपेश सुनारले प्रतिस्पर्धा गरेका थिए । टिम प्रशिक्षकमा गंगा गुरुङ रहेका छन् ।
पत्रकार सम्मेलनमा सेपाकताक्रो संघका संस्थापक अध्यक्ष एवं प्रमुख सल्लाहकार सीताराम मास्के एसियाली सेपाकताक्रो महासंघको उपाध्यक्षमा निर्विचित भएको जानकारी गराइयो । मास्के अन्तर्राष्ट्रिय सेपाकताक्रो महासंघका सदस्य पनि हुन् ।
त्यस्तै दक्षिण एसियाली सेपाकताक्रो महासंघमा नेपालबाट पाँच जना निर्वाचित भएका छन् । अध्यक्षमा सीताराम मास्के, महासचिवमा ध्रुव गुरुङ, सचिवमा नेत्रप्रसाद गुरुङ तथा सदस्यमा राष्ट्रिय खेलकुद परिषद्का सदस्य-सचिव केशवकुमार विष्ट र गंगा गुरुङ निर्वाचित भए ।
कार्यक्रममा जनवरी १३ देखि १५ तारिखसम्म श्रीलंकाको कोलम्बोमा हुने दोश्रो दक्षिण एसियाली सेपाकताक्रो प्रतियोगितामा नेपालले सहभागिता जनाउने तथा तेश्रो दक्षिण एसियाली सेपाकताक्रो प्रतियोगिता नेपालमै आयोजना गर्ने योजना रहेका समेत जानकारी दिइएको थियो ।
