काठमाडौं । बालमैत्री देश निर्माणको अभियान लिएर अघि बढेका हाँस्यकलाकार सिताराम कट्टेल (धुर्मुस) र कुञ्जना घिमिरे (सुन्तली) को चलचित्र ‘ज्योति’ हेर्न जनसागर उर्लिएको छ । हिमाली जिल्ला रसुवामा समेत बालमैत्री फिल्म ‘ज्योति’ हेर्न आम नागरिकको ओइरो लागेको हो ।
रामेछाप, दोलखा, सिन्धुपाल्चोक, काभ्रे हुँदै फिल्म देखाउन रसुवा पुगेका धुर्मुस सुन्तलीलाई जाडोको पर्वाह नगरी साँझको समयमा समेत १० हजारभन्दा बढी दर्शकको साथ मिलेको छ । उनीहरुले रसुवाको धुन्चे र कालिकास्थानमा बालमैत्री फिल्म ‘ज्योति’ प्रर्दशन गरेका छन् ।
निकै चिसो मौसमका बाबजुद पनि बालमैत्री फिल्म हेर्ने दर्शकको उल्लेख्य उपस्थिति थियो । फिल्म हेरीसकेपछिको प्रतिक्रिया एवं प्रतिबद्धताले आफुहरुमा नयाँ जोस प्राप्त भएको सिताराम कट्टेलले बताएका छन् ।
नयाँ पुस्ताको सोचलाई सकारात्मक बनाउन सकेमा देशको भविष्य उज्वल हुने कुञ्जना घिमिरेको भनाई छ । बालमैत्री स्थानीय शासनका ३९ सूचक समावेश गरेर बनाइएको चलचित्र ‘ज्योति’ले बालमैत्री स्थानीय शासन कार्यान्वयनमा धेरै सहयोगी बन्ने अपेक्षा लिइएको छ । पुनर्निर्माणको कामबाट समेत प्रशंसा बटुलेका उनीहरुले देश बनाउनका लागि बालमैत्री स्थानीय शासन अपरिहार्य रहेको बताएका छन् । संघीय मामिला तथा स्थानीय विकास मन्त्रालयको समन्वयमा अभियान सुरु गरेका उनीहरुलाई युनिसेफ नेपालको सहयोग मिलेको छ ।
