६ पुस काठमाडौं । इरानको सबैभन्दा पुरानो गगनचुम्बी भवन आगलागी भएर ढलेपछि ३० जना अग्नि नियन्त्रकको मृत्यु भएको छ ।
तेहरानको मुख्य बजारमा रहेको १५ तल्ले प्लास्को भवनमा आगलागीको टेलिभिजनमा प्रत्यक्ष प्रशारण भइरहेका बेला ढलेको थियो ।
सरकारी टेलिभिजनका अनुसार यहाँ आगो निभाउन २ सय बढि अग्नि नियन्त्रक खटिएका थिए । उनीहरुमध्ये ३८ जना घाइते भएको र दर्जनौं हराइरहेका छन् ।
१९६० मा निर्माण भएको यो भवनभित्र एउटा सपिङ सेन्टर तथा लुगाको वर्कसपहरु थिए । ‘भवन ढल्दा केही अग्नि नियन्त्रक र भवनका रेखदेख गर्ने व्यक्तिहरु भित्रै थिए,’ भवनभित्र एउटा पसल चलाउने अहमदले भने, ‘मेरो पसल सबै खरानी भयो । हजारौं परिवारको विचल्ली भएको छ ।’
एक प्रत्यक्षदर्शी मोहसेनले एएफपीलाई भने, ‘मेरो एकजना साथीको पसल त्यहाँ थियो । मैले उसलाई फोन गरिरहेको छु तर, उठ्दैन । सायद भित्रै थुनियो होला ।’
एक सय दमकल र दर्जनौं एम्बुलेन्सहरुले भवनलाई घेरिरहेका बेला यसको स्टिलको संरचना गर्ल्यामगुर्लुम ढलेको थियो । केही सेकेन्डभित्रै भवन भग्नावशेषमा परिणत भयो, जुन दृष्य टेलिभिजनमा लाइभ देखिएको थियो ।
ग्यास लिक भएर विष्फोट हुने डरले प्रहरीले भवन वरिपरीको क्षेत्रलाई खाली गराएको थियो र मानिसहरुको भिडलाई पनि हटाएको थियो ।