तपाइले नायिका रेखा थापाको चलचित्रमा काम गर्ने शैली हेर्नु भयो भने पनि यो अड्कल लगाउन सक्नुहुन्छ कि, आखिर किन उनी नयाँ अनुहारसँग काम गरिरहेकी छिन् ? रेखाले चलचित्र ‘हिरो’मा नायक राजेश हमालसँग काम गरिन् ।
तर, रेखाको जोडी राजेशसँग लामो समय टिकेन । अहिले त उनीहरुविच बोलचाल पनि छैन । रेखाले बरु, आफ्नो ब्यानरमा आर्यन सिग्देल, आयुष रिजाल, सविन श्रेष्ठ जस्ता नयाँ अनुहारलाई भित्राइन् र काम गरिन् । तर, उनले पुराना नायकहरुसँग त्यती लामो सहकार्य गरिनन् ।
अब, वुधबारमात्र घोषणा गरिएको चलचित्र ‘कसो कसो माया बस्यो’लाई नै हेरौ न । यो चलचित्रमा नायक आर्यन अधिकारी मुख्य भूमिकामा छन्, जो यसै बर्षबाट चलचित्र क्षेत्रमा भित्रिएका हुन् । आर्यनले, नयाँ नायिका मरिष्का पोख्रेलदेखि चल्तीकी नायिका प्रियंका कार्कीसँग काम गरिरहेका छन् । रेखा, अब उनै आर्यनसँग काम गर्न तयार छिन् ।
रेखाको यो काम गर्ने शैली गज्जबको छ । किनकी, उनलाई पुरानो भन्नेहरुलाई उनी नयाँ नायकसँग काम गरेर जवाफ दिइरहेकी छिन् । चलचित्र ‘पलाँस’मा रेखाले कामेश्वर चौरासियासँग काम गर्न तयार भइन् । कामेश्वरको चर्चा अहिले बजारमा राम्रै छ । उनलाई नै रेखाले पर्दामा सहकर्मी बनाइन् ।
सविन श्रेष्ठ, किशोर खतिवडा त रेखासँग पर्दामा सबैभन्दा बढी दोहोरिने कलाकार हुन् । चलचित्र ‘डायरी’मा रेखाले छुल्ठिम गुरुङदेखि नयाँ नायकसँग काम गरिन् । रेखाको काम गर्ने यो शैलीले पनि के प्रष्ट पार्छ भने, उनी आफूलाई अहिलेकै नायिकाको स्थानमा उभ्याउन चाहन्छिन् ।
अधिकांश नायिकाहरु पुरानी हुँदै गएपछि नयाँ नायकहरुसँग काम गर्न चाहदैनन् । तर, रेखा आफ्नो स्टारडमलाई यथावत् राख्नकै लागि यो शैली अपनाइरहेकी छिन् । बजारमा आउने हटकेक नायकसँग पर्दा शेयर गर्ने रेखाको शैलीले, उनको चतुर्याँई पनि पुष्टी गर्छ ।
