१४ फागुन, काठमाडौं । शनिबार देशभरका १२ वटा क्याम्पसको स्ववियू चुनावमा नेकपा माओवादी केन्द्र निकट अखिल क्रान्तिकारी विजयी भएको छ । बर्दियाको सानो श्रीस्थित गुराँस बहुमुखी क्याम्पसमा भएको मतदानमा क्रान्तिकारीले जितेको छ ।
दोलखाको त्रिपुरा क्याम्पस, गुल्मीको जनज्योति क्याम्पस, सल्यानको वनगाड क्याम्पस, फारुला बहुमुखी क्याम्पस र शिवजन क्याम्पसको स्ववियूमा क्रान्तिकारी निर्बिरोध विजयी भएको छ ।
त्यसैगरी लटिनाथ बहुमुखी क्याम्पस र गोकुलेश्वर बहुमुखी क्याम्पसमा पनि आफूले जीत हात परेको एक विज्ञप्ति जारी गर्दै क्रान्तिकारीले जनाएको छ । रुकुमको सिमृतु शिक्षा क्याम्पस, सानोभेरी शिक्षा क्याम्पस, स्यार्पु बहुमुखी क्याम्पस र सिस्ने शिक्षा क्याम्पसमा पनि क्रान्तिकारीले निर्बिरोध जीत हात पारेको छ ।
विज्ञप्तिमा क्रान्तिकारीका अध्यक्ष नरेन्द्र न्यौपानेले अनेक प्रतिकुलताका बाबजुद नेवि संघ लगायतका कतिपय संघ/संगठनहरुले अप्रत्यासित रुपमा बिहानैदेखि विभिन्न क्याम्पसहरुमा तालाबन्दी गरेको भन्दै यसले समग्र निर्वाचन प्रक्रियालाई धरापमा पार्ने काम भएको दावी गरेका छन् । निर्वाचनको मुखमा आएर चालिएको यस्तो अलोकतान्त्रिक हर्कत प्रति निन्दा र भत्र्सना गर्ने विज्ञप्तिमा उल्लेख छ ।
क्रान्तिकारीले स्ववियुको गरीमा र अस्तित्व बचाउनका लागि अविलम्ब लोकतान्त्रिक प्रक्रियामा आउन नेवि संघ लगायतका सबै संघ/संगठनहरुलाई अपिल पनि गरेको छ ।
निर्वाचनमा देखिएका सबै व्यवधान तत्काल हटाइ निर्धारित मिति मै स्ववियु निर्वाचन सम्पन्न गर्न त्रिभुवन विश्वविद्यालयसँग माग गरिएको छ ।
यता धादिङको गजुरीमा रहेको आदर्श बहुमुखी क्याम्पसमा भएको स्ववियु निर्वाचनमा एमाले निकट अनेरास्ववियुको प्यानल नै विजयी भएको छ । अनेरास्ववियुका रुपक गिरी स्ववियु सभापतिमा निर्वाचित भएका छन् ।
कुन-कुनमा जित्यो क्रान्तिकारीले ?
क्याम्पसको नाम | जिल्ला | विजेता अध्यक्षको नाम | कैफियत |
---|---|---|---|
गुराँस बहुमुखी क्याम्पस, सानोश्री | बर्दिया | धनसरा ढकाल | विजयी |
त्रिपुरा क्याम्पस, नाम्दु | दोलखा | शालिकराम उप्रेती | निर्विरोध |
जनज्योति क्याम्पस, पुर्कोटदह | गुल्मी | सृजना घिमिरे | निर्विरोध |
बनगाड क्याम्पस, बनगाड | सल्यान | इन्द्रबहादुर बुढाथोकी | निर्विरोध |
फारुला बहुमुखी क्याम्पस, फारुला | सल्यान | रामप्रसाद शर्मा | निर्विरोध |
शिवजन क्याम्पस, सित्तलपाटी | सल्यान | हरिप्रकाश वली | निर्विरोध |
लटिनाथ बहुमुखी क्याम्पस, मार्मा | दार्चुला | नरबहादुर विष्ट | निर्विरोध |
गोकुलेश्वर बहुमुखी क्याम्पस, गोकुलेश्वर | दार्चुला | भुवन भण्डारी | निर्विरोध |
सिमृतु शिक्षा क्याम्पस, रुघा | रुकुम | जीवन पुन मगर | निर्विरोध |
सानोभेरी शिक्षा क्याम्पस, सिम्ली | रुकुम | राम ब. विष्ट | निर्विरोध |
स्यार्पु ब. क्याम्पस, बाफिकोट | रुकुम | नवराज के.सी. | निर्विरोध |
सिस्ने शिक्षा क्याम्पस, रुकुमकोट | रुकुम | श्रीकुमार बुढाथोकी | निर्विरोध |