तीज, गाईजात्रा, कृष्ण जन्माष्टमी लगायतका सार्वजनिक बिदा धेरै पर्ने भएकाले पनि भदौ महिना नेपाली चलचित्र निर्माताका लागि विशेष हुने गर्छ । हरेक वर्ष बैशाख नलाग्दै भदौमा चलचित्र प्रदर्शनको मिति सार्वजनिक गर्ने निर्माताहरुले यसपटक पनि त्यसै गरेका छन् । नायक अनमोल केसी अभिनित ‘कृ’ भदौ ८ गते रिलिज हुने भएको छ भने निश्चल बस्नेत अभिनित ‘२ रुपैयाँ’ पनि रिलिज हुने तयारीमा छ।
यस्तै, भदौ २ गतेबाट आशिरमान देसराज जोशी र आना शर्माको मुख्य भूमिका रहने चलचित्र ‘ग्याङस्टार ब्लूज’को रिलिज डेट तोकिएको छ । आउँदो बर्षको सबैभन्दा बढी अपेक्षा गरिएका सबैजसो चलचित्र भदौमा प्रदर्शन मिति तोकेर बसेका छन् ।
सुरेन्द्र पौडेलको निर्देशन रहने ‘कृ’मा अनमोल र अदिती बुढाथोकी मुख्य भुमिकामा देखिदैछन् । अदिती सामाजिक सञ्जालमा राम्रो पकड भएकी मोडल समेत हुन् । अनमोल र अदितीको जोडी युवा दर्शकलाई मनपर्ने दाबी निर्देशकले गरे ।
यी बाहेक अन्य चलचित्र समेत भदौमै रिलिज हुन सक्ने निर्माताको अनुमान छ । भदौमा महिना सार्वजनिक विदा धेरै पर्ने र चाडवाडको माहोल हुने भएकाले पनि चलचित्र रिलिजका लागि निर्माताले मरिहत्ते गरेको चलचित्र संघका अध्यक्ष प्रदिप उदयको भनाई छ ।
