११ चैत, काठमाडौं । काठमाडौंको कोटेश्वरस्थित भूमि भैरव मन्दिर नजिकै शुक्रबार दुईवटा मोटरसाइकल ठोक्किँदा एकजनाको मृत्यु भएको छ । दुई युवती र एक युवक घाइते भएका छन् ।
प्रहरीका अनुसार एकैतिरबाट गैरहेका बा ५३ प ५४२६ र बा ६० प ९४९६ नम्बरको पल्सर मोटरसाइकल शुक्रबार दिउँसो ठोक्किएका थिए ।
दुर्घटनामा बा ६० प ९४९६ नम्बरको मोटरसाइकल चालक भत्सल मोरको मृत्यु भएको हो । उनको ट्रमा सेन्टरमा उपचारको क्रममा मृत्यु भएको प्रहरीले जनाएको छ ।
उनले चलाएको मोटरसाइकलको पछाडि सवार युवती आस्मा सिंह गम्भीर घाइते भएको प्रहरीले जनाएको छ । उनको पनि ट्रमा सेन्टरमा उपचार भैरहेको छ ।
त्यस्तै अर्को मोटरसाइकलमा सवार सुमन कडरिया र शुभेक्षा खत्री भने सामान्य घाइते भएका छन् । उनीहरु दुबै जनाको तीनकुनेस्थित कान्तिपुर अस्पतालमा उपचार भइरहेको छ ।
