१५ चैत, काठमाडौं । एसियन कप छनौट अन्तर्गत फिलिपिन्सबिरुद्ध जारी खेलमा नेपाल सुरुवाती १२ मिनेटमै १० खेलाडीमा समेटिएको छ ।
खेलको १२औं मिनेटमा फिलिपिनो खेलाडीको हेडर प्रहार नेपाली मिडफिल्डर बिक्रम लामाले हातले रोकेका थिए । रेफ्रीले उनलाई सिधै रेड कार्ड देखाए भने फिलिपिन्सलाई पेनाल्टीको अवसर दिए ।
टोलीका कप्तान फिल योङहस्वेण्ड प्रहार गरेको पेनाल्टी नेपाली गोलरक्षक किरण चेम्जोङले रोकेर गोलको खतरा टारेका थिए ।
तर फिलिपिन्सले २१औं मिनेटमा पुनः पेनाल्टीको अवसर पायो । त्यस अवसरमा भने फिल चुकेनन् र १-० को अग्रता दिलाए । डिफेण्डर रविन श्रेष्ठले फिलिपिनो खेलाडीलाई डिबक्सभित्र फल गरेपछि उसले पेनाल्टीको अवसर पाएको थियो ।
त्यसको दुई मिनेट बित्न नपाउँदै फिलिपिन्सले अर्को गोल गर्यो । उसका लागि फिल योङहस्वेण्डले गोल गरे ।
२८औं मिनेटमा नेपालले तेस्रो गोल खायो । यसपटक इयान राम्सेले फिलिपिन्सका लागि गोल गरे ।
सुरुवातमै १० खेलाडीमा समेटिनुपरेपछि नेपालले अहिले रक्षात्मक खेल खेलिरहेको छ ।