२४ अप्रील, अमेरिका । अमेरिकाको उत्तरी राज्य मिनिसोटाको एक विश्वविद्यालयमा अध्ययनरत नेपाली विद्यार्थीको नदीमा डुबेर मृत्यु भएको छ ।
स्थानीय साउथवेस्ट मिनिसोटा स्टेट यूनिभर्सिटीमा अध्ययन गर्ने अर्बिन थापा शनिबार दिउँसो पौडी खेल्ने क्रममा नदी डुबेका थिए ।
मृतक थापाका आफन्त प्रवासी नेपाली मञ्च अमेरिकाका अध्यक्ष प्रभु थापाका अनुसार डेढ वर्ष अघि उच्च शिक्षाका लागि उनी अमेरिका आएका थिए । उनी हस्पिटालिटी म्यानेजमेन्ट अध्ययन गर्न सन् २०१५ अगष्टमा अमेरिका आएका थिए ।
लमजुङको सुन्दरबजार-३ भोटेओढार घर भएका २० वर्षीय थापाको शवलाई पोस्टमार्टमका लागि स्थानीय अस्पतालमा राखिएको छ । शनिबार नदीमा डुबेर बेपत्ता पाएका उनको शव आईतबार बिहान भेटिएको थियो ।