१५ बैशाख, काठमाडौं । सर्जिओ एग्युरोलाई हेडबट हानेपछि फेलिनीले रातो कार्ड पाएका छन् र म्यानचेष्टर युनाइटेडले सिटीसँग गोलरहित बराबरी खेलेको छ ।
बिहीबार राति भएको पि्रमियर लिगको म्यानचेष्टर डर्बीमा युनाइटेड र सिटीले गोलरहित बराबरी खेलेका हुन् ।
अन्तिम केही मिनेट १० खेलाडीमा सिमित भएको युनाइटेडको शीर्ष चारमा पर्ने सम्भावना अझै जिवितै छ । साथै लिगमा अपराजित यात्रा २४ खेल भएको छ ।
तर, घरेलु मैदान उत्तेहाद स्टेडियममा भएको खेल भने सिटीका लागि सुखद रहेन । ७९ औं मिनेटमा गोलकिपर ब्राभो घाइते भएर मैदान छाड्नुपर्यो । ५ मिनेटपछि नै उसका स्ट्राइकर सर्जिओ एग्युरोमाथि हेडबट प्रहार भयो ।
अर्जेन्टिनी स्ट्राइकर एग्युरोलाई हेडबट हान्ने युनाइटेडका फेलिनीले साझै रातो कार्ड पाएका छन् ।
बराबरीपछि सिटी लिगमा ५ खेल बाँकी छँदा ६५ अंकका साथ चौथो स्थानमा छ भने युनाइटेड ६४ अंकका साथ पाँचौं स्थानमा छ । तेस्रो स्थानमा रहेको लिभरपुलको ६६ अंक छ र, उसले एक खेल बढी खेलेको छ ।
