१८ बैशाख, काठमाडौं । नयाँ शक्ति नेपालका संयोजक डाक्टर बाबुराम भट्टराईले लोकतन्त्रको पहरेदार बन्नुपर्ने दलहरुनै ‘एजेन्ट’ बनेको भन्दै लोकतन्त्रमा गम्भीर संकट देखिएको टिप्पणी गरेका छन् ।
सामाजिक सञ्जालमा लामो ‘स्टाटस’ लेख्दै पूर्व प्रधानमन्त्री डा. भट्टराईले राजनीतिमा बिकसित पछिल्ला घटनाक्रमहरुले लोकतन्त्र गम्भीर संकटमा परेको बताएका छन् ।
जनतासँग सोझै सरोकार भएका सबै संस्थाहरुमा चरम दलीयकरण र नेतृत्व पंक्तिको नैतिक पतनले यो संकट निम्त्याएको भट्टराईको टिप्पणी छ ।
राजनीतिक दल र त्यसका नेतृत्वको असक्षमताको परिणामको रुपमा राज्यका अंगहरुमा नचाहिँदो हस्तक्षेप भइरहनु संविधान कार्यान्वयमा जटिलता थप्ने र जनतामा निराशा थप्ने काम भएको भट्टराईले आरोप लगाएका छन् ।
पढ्नुहोस डा. भट्टराईले सामाजिक सञ्जालमा गरेको टिप्पणीको पूर्ण पाठ
नेपाली राजनीतिमा विकसित केही घटनाक्रमहरुले लोकतन्त्र गम्भीर संकटमा छ भन्ने स्पष्ट पार्छ । लोकतन्त्रका पहरेदार हुनुपर्ने राजनीतिक दलहरु नै यस्तो संकट निम्त्याउने एजेन्ट बन्नु चिन्ताको विषय हो । जनतासँग सोझो सरोकार भएका सबै संस्थाहरुको चरम दलीयकरण र नेतृत्व पंक्तिको नैतिक पतनले यो संकट निम्त्याएको हो ।
नेपाल प्रहरी प्रमुखको नियुक्तिमा देखिएको विवाद र त्यो विवाद बढ्दै गएर प्रधानन्यायाधीश विरुद्ध दर्ता भएको महाअभियोगसम्म पुग्नु बिडम्बना हो । साथै, यो आँफैमा नेपालका प्रमुख राजनीतिक दल र ति दलका नेतृत्वको अक्षमताको परिणाम हो । संविधानको स्वीकार्यताको दायरा फराकिलो बनाउँदै कार्यान्वयन गर्नुपर्ने गम्भीर उत्तरदायित्वलाई भुलेर राज्यका अंगमा नचाहिँदो हस्तक्षेप गर्न थाल्नु आफ्ना प्राथमिक दायित्वलाई लत्याउने प्रयास हो । साथै, संविधान कार्यान्वयनमा जटीलता थपेका मधेस लगायतका मुद्दालाई जबर्जस्ती पन्छाउन खोज्ने दुष्प्रयत्न पनि हो । यसले जनतामा निराशा बढाउने काम गरेको छ ।
नेपाली राजनीतिमा पञ्चायतदेखि नै संस्थागत भएको भ्रष्ट आचरण र विधिप्रतिको चरम उदासिनता गणतन्त्रले सुल्झाउनेछ भन्ने ठूलो आशा सञ्चार भएको थियो जनतामा । तर, गणतन्त्र प्राप्तिपछिको समयमा त्यसको ठीक विपरित त्याज्य संस्कारलाई अझ घनिभूत बनाइयो । उही पुरानो सत्ताको छिनाझपटीमा मात्रै राजनीतिको वृहद आयामलाई खुम्च्याइयो । संविधान निर्माणदेखि अन्य सबै संवेदनशील काममा देखाइएको लापरवाहीपनले आशावान हुन खोजेका जनतालाई जबर्जस्ती निराशाको गर्तमा धकेलेको छ ।
त्यसैले अब खाँचो इमान्दार र दूरदर्शी राजनीतिक नेतृत्वको विकासको हो । त्यसका लागि नयाँ राजनीतिक संस्कार हुर्किने प्रशस्त ठाउँ भएको राजनीतिक दलको निर्माण जरुरी छ । यही प्रयत्नलाई मूर्त रुप दिन नयाँ शक्ति पार्टी, नेपालको उदय भएको हो । वर्तमान राजनीतिक नेतृत्व र प्रमुख भनिएका राजनीतिक दललाई एकोहोरो आलोचना गरेर मात्र अघि बढ्न नसकिने स्पष्ट छ । आलोचना र भण्डाफोर जस्ता कामले ती दल र तिनका नेतृत्वमा कुनै नयाँ चेतना विकास गर्न नसकिने स्पष्ट भइसकेको छ । उनीहरुमा बदलाव आउला भनेर पर्खनु मुर्खता हुने भएकैले नयाँ शक्तिको परिकल्पना अघि सारिएको हो ।
अहिले सतहमा देखिएका बिडम्बनापूर्ण घटनाक्रमहरु दोहोरिनु भनेको हिजोको लामो संघर्षबाट प्राप्त भएका उपलब्धी बिस्तारै गुम्दै जानु हो । प्राप्त उपलब्धीको रक्षा गर्दै अहिले बाक्लिएको निराशाको घना बादल चिर्नका लागि एउटा जनस्तरबाट संगठित, सुविचारित र गम्भीर राजनीतिक सुझबुझका साथ गरिने सकारात्मक हस्तक्षेप जरुरी छ । त्यसै प्रयत्नमा अघि बढेको नयाँ शक्ति पार्टीलाई जनताको दीगो साथ रहनेछ भन्नेमा हामी विश्वस्त छौं ।
