जेठ १२ गते अर्थात भोली शुक्रबारबाट रिलिज हुने चलचित्र ‘हिटलर’लाई लिएर नायिका सामिया बर्तौला निकै उत्साहित छिन् । उनलाई सानैदेखि उनकी आमाले ‘हिरोइन’ बन्छेस् भन्ने गर्नुहुन्थ्यो । त्यही कुराले नै उनलाई यो क्षेत्रमा तानेको थियो ।
सामिया अहिले मिडियामा दौडदा, आफ्नो तस्बिर आउँदा छोटो समयमा नै यती चर्चा पाइन्छ जस्तो नलागेको सुनाउँछिन् । उनले अनलाइनखबरसँग भनिन्-‘मैले यति चाडो चर्चामा आइन्छ भन्ने सोचेकी थिइनँ । अहिले मलाई मानिसहरुले चिन्न थालेका छन् ।’
भोलीबाट रिलिज हुने चलचित्र ‘हिटलर’ रोमान्टिक तथा कमेडी कथामा निर्माण भएको उनको भनाई छ । यो चलचित्रमा उनी राणा खानदानकी छोरीको भूमिकामा छिन् । कस्तो रह्यो त चलचित्र छायांकनको पल, उनले भनिन्-‘एकदमै रमाइलो भयो । सोहित र म नजिकको साथी हौँ । मेनुका दिदी, ए गुरुङ दाइसँग काम गर्दा रमाइलो भयो । अहिले म रारा गएको मिस गरिरहेकी छु ।’
उनले, रारामा माइनस १० डीग्रीमा ओपन पहिरन लगाएर काम गर्दा पनि जाडो महशुश नगरेको सुनाइन् । उनले, आफू भन्दा त रारा नै राम्रो रहेको समेत बताइन् ।
किन हेर्नुपर्छ ‘हिटलर’, नव-नायिका हाँस्दै भन्छिन्-‘नयाँ नयाँ कलाकार भएकाले पनि हेर्नुपर्छ । चलचित्रको नाम नै खतरनाक छ । चलचित्रमा सस्पेन्स के छ भनेर पनि हेर्नुपर्छ ।’
उनले चलचित्र भित्र भरपुर कमेडी रहेको समेत सुनाइन् । सामियाले भनिन्-‘म त चलचित्रको छायांकन सुरु भएदेखि नै हाँसेको हाँसै छु । दर्शकले पनि ए गुरुङको कमेडीबाट पूर्ण मनोरञ्जन लिनुहुनेछ ।’
चलचित्र क्षेत्रमा लाग्ने वित्तिकै कुनै यूवतीको बारेमा नराम्रो टिप्पणी हुने गरेकोमा सामियालाई दुःख लाग्छ । वुझ्ने मान्छेले सकारात्मक टिप्पणी गरेपनि धेरैले नकारात्मक टिप्पणी गर्ने गरेको उनको वुझाई छ । उनले भनिन्-‘नेपाली चलचित्रमा त कुनै केटा र केटी पर्दामा देखिदा पनि नराम्रो सोचिन्छ । बलिउडमा काम गरे त्यसैको प्रशंसा हुन्छ ।’ उनले आजसम्म आफूलाई कसैले ‘खराब केटी’ भनेर नभनेको समेत सुनाइन् । धेरैले उनलाई चलचित्र क्षेत्रमा किन गएको भनेर प्रश्न समेत गरेका छन् ?
उनले, चलचित्र ‘हिटलर’ सफल हुनेमा आफू पूर्ण रुपमा विश्वस्त रहेको समेत सुनाइन् । नेपाली चलचित्र क्षेत्रमा ‘हिटलर’ चलचित्रबाट भाग्य चम्काउने तयारीमा रहेकी सामियाको परिक्षा भोलीबाट सुरु हुँदैछ । के, सामिया चलचित्र क्षेत्रमा चम्किएलिन् ?