१५, जेठ, चितवन । मतपत्र च्यातिएपछि मतगणना रोकिएको भरतपुर महानगरपालिकाको निर्वाचन अनुगमन गर्न गठित टोली भरतपुर आइपुगेको छ ।
आयोगले गठन गरेको टोली सोमबार दिउँसो भरतपुर आएर प्रमुख निर्वाचन अधिकृत सहितका अन्य पदाधिकारी, प्रमुख जिल्ला अधिकारी, प्रहरी प्रमुख, मतगणनाका गणकहरुसँग मतगणना केन्द्रमा भएको घटनाका विषयमा जानकारी लिएको छ ।
आयोगको बैठकले सहन्यायधिवक्ता गीताप्रसाद तिमल्सिनाको अध्यक्षतामा ३ सदस्यीय अनुगमन टोली गठन गरेको थियो । समितिमा तिमल्सिनासहित गृहमन्त्रालय सहसचिव महेश न्यौपाने र एक प्रहरी नायव महानिरीक्षक छन् । समितिलाई १७ गतेभित्र यर्थाथ अवस्थाको बारेमा प्रतिवेदन दिन भनिएको छ ।
टोलीले राजनीतिक पार्टीहरुसँग भने भोलि मंगलवार मात्रै छलफल गर्ने जानकारी आएको छ । ‘अनुगमन तथा छानविन टोलीले हामीलाई अहिलेसम्म खबर गरेको छैन’ एमाले चितवनकी सचिव पार्वती रावलले भनिन् ‘सायद भोलि छलफल हुन्छ होला ।’
महानगरपालिकाको वडा नः १९ को मतगणना अन्तिम चरणमा पुगेका बेला दलका प्रतिनिधीले मतपत्र च्यातिदिएका थिए । करीव १ सय मत च्यातिएको अनुमान गरिएको छ । च्यातिएका मतपत्रलाई तन्नामा बेरेर मुचुल्का उठाई राखिएको छ ।
घटनाको बिरोधमा एमालेले सोमवार भरतपुरमा बिरोध र्याली निकालेको थियो । मंगलवार बिहान ८ बजेपनि नारायणगढको पूल्चोकबाट बिरोध र्याली निकाल्ने र मतगणना केन्द्रस्थल बाहिर धर्ना दिने जनाएको छ ।
माओवादी केन्द्र र कांग्रेसले भने वडा नः १९ मा पुन मतदान हुनुपर्ने माग बिज्ञप्ती जारी गरी गरेका छन् ।
