१६ जेठ, काठमाडौं । नेपाली कांग्रेसले सहमतीय सरकारको नेतृत्व दाबी गरेको छ । कांग्रेस सभापति शेरबहादुर देउवाले व्यवस्थापिका संसदमा रहेका दलहरुको बैठक बोलाएर आफ्नो नेतृत्वमा सरकार गठनको प्रस्ताव गरेका हुन् ।
यद्यपि देउवाले बोलाएको बैठकमा प्रमुख विपक्षी दल नेकपा एमाले अनुपस्थित रहृयो ।
संसद भवनमा बसेको सर्वदलीय बैठकमा कांग्रेस सभापति देउवा र वरिष्ठ नेता रामचन्द्र पौडेलले कांग्रेसको नेतृत्वमा सहमतीय सरकार गठनको प्रस्ताव गरे ।
बैठकमा प्रधानमन्त्री एवं माओवादी अध्यक्ष प्रचण्डले कांग्रेससँग भएको समझदारी अनुसार नै आफूले राजीनामा दिएको र अब आफ्नो समर्थन कांग्रेसलाई भएको बताए ।
माओवादी नेता नारायणकाजी श्रेष्ठ प्रकाशले पनि सहमतिप्रति आफूहरु प्रतिवद्ध रहेको बताए । तर, सरकारको नेतृत्वबारे कांग्रेस खुला रहे आफूहरु त्यसमा पनि तयार हुने बताए ।
संसदको चौथो ठूलो दल राप्रपा पनि कांग्रेसको नेतृत्वमा सरकार गठनप्रति सकारात्मक देखिएको छ । राप्रपा अध्यक्ष कमल थापाले आफ्नो दलको मत प्रतिपक्ष हुनु पर्छ भन्ने रहेको भन्दै तीन दल मिलेर सरकार बनाए आफूहरु प्रतिपक्षमा बस्ने बताए ।
तर, कांग्रेसको नेतृत्वमा बहमुतीय सरकार गठनप्रति आफूहरु सकारात्मक रहेको उनले बताए । सरकारमा सहभागिताका लागि दुई दलबीच छलफल हुने पर्ने उनले बताएका छन् ।
बैठकमा राजपा नेताहरुले आफूहरुको माग सम्बोधन हुनु पर्ने बताएका छन् भने प्रचण्ड सरकारमा रहेका अधिकांश दलले कांग्रेसलाई समर्थन गर्ने बताएका छन् ।
नेताहरुले भने – बैठकको अंग नै पुगेन
सर्वदलीय बैठक भनिएपनि प्रमुख विपक्षी दल नेकपा एमाले अनुपस्थित रहृयो । एमालेको अनुपस्थितिलाई लिएर माओवादी नेता नारायणकाजी श्रेष्ठ प्रकाशसहितका नेताहरुले सर्वदलीय बैठकको अंग नै नपुगेको टिप्पणी गरेका छन् ।
कांग्रेसले सर्वदलीय बैठकका लागि बोलाउनु पर्नेमा आफ्नो नेतृत्वमा सहमतीय सरकार गठनका लागि भनेर पत्र पठाउनु गलत भएको नेताहरुले बताएका छन् ।
तर, कांग्रेस नेताहरुले भने भाषा ठूलो कुुरा नभएको भन्दै मर्म बुझेर आउनु पर्ने बताएका छन् ।
