“झन्डै ७९ मिटर ठाडो तल रहेको चिलाउनेघारी मुहानबाट नौ वटा सोलार प्यानलमार्फत लिफ्ट गरेर गाउँमाथि रहेको ट्यांकीमा पानी सङ्कलन गरेका छौँ” चिलाउनेघारी सोलार लिफ्टिङ खानेपानी योजनाका अध्यक्ष पदम थापाले भने, “प्रत्येक घरधुरीमा छुट्टाछुट्टै धारा निर्माण गरी खानेपानीको उपभोग गर्दै आएका छौँ ।”

आँधीखोला सामुदायिक विकास केन्द्रका कार्यक्रम संयोजक पौडेलले गाउँमा सम्भवतः आफूहरुले पहिलो पटक मिटर सिस्टम लागू गरेको बताउँदै न्यूनतम २० र त्यसपछि प्रतियुनिट १० का दरले पैसा सङ्कलन गरिएको र उक्त रकम मर्मत तथा भैपरी आउने खर्च व्यवस्थापनका लागि प्रयोग गरिएको जानकारी दिए ।

सो ठाउँमा खानेपानीको सुविधासँगै स्थानीयवासीलाई तरकारी खेतीप्रति आकर्षित गर्नका लागि पनि सिँचाइका लागि २५ हजार लिटर क्षमताको प्लास्टिक पोखरी निर्माण गरिएको छ ।

“वर्षौंदेखि पिँठ्युमा पानी बोकेर खान बाध्य बनेका गाउँलेको पानीसँगै दिनचर्यामा पनि परिवर्तन आएको छ” अध्यक्ष थापाले भने, “उत्कृष्ट र धेरै तरकारी उत्पादन गर्ने छ जना किसानलाई हामीले पानीको महसुस मिनाहा गरी व्यावसायिक तरकारी खेतीतर्फ प्रेरित गरेका छौँ ।”