४ साउन, काठमाडौं । पछिल्लो समय काठमाडौंमा ‘स्ट्रिट फुड’को व्यवसाय फस्टाउँदो छ । ग्राहकहरुको आकर्षण बढेको देखेपछि यस्ता फुड स्टलको संख्या बढ्दो छ ।
‘स्ट्रिट फुड’ प्राय पत्रपत्रिका तथा पुराना किताब कापीका पानामा पोको पारेर दिने गरेका छन् । झट्ट हेर्दा आइडिया गजब हो । व्यापारीलाई भाँडा माझ्नु पर्ने झन्झटबाट उन्मुक्ति भने खाने मानिसहरुलाई जुठो वा सफा नभएको भाँडा पर्यो भन्ने चिन्ता नहुने ।
तर, मसी प्रयोग गरिएको कागज तथा पत्रपत्रिकामा प्याक गरिएको खाना सेवन गर्दा क्यान्सर हुनसक्ने देखिएको छ । रसायन तथा माइक्रोबायोजिकल मिसावटका कारण शरीरमा स्लो प्वाइजनिङ्ग हुनसक्ने भन्दै भारतले कागजमा खाना प्याक गर्न रोक लगाएको छ ।
भारतस्थित खाद्य सुरक्षा आयोगले मसी प्रयोग गरिएको कागज तथा पत्रपत्रिकामा खाना प्याक गर्न, राख्न तथा बेचविखन गर्न एक वर्षसम्म रोक लगाएको हो ।
मसी कोरिएको कागजमा क्यान्सर गराउन सक्ने तत्व सामेल हुन सक्ने भन्दै गत डिसेम्बरमा भारतको खाद्य सुरक्षा तथा मानक प्राधिकरणले यस्ता पत्रिकामा खाना प्याक गर्न तथा यस्ता कागजमा पोको पारिएको खाना नखान सुझाव दिएको थियो ।
समाचारहरुमा जनाइएअनुसार भारतीय अधिकारीहरुले यस्ता कागतमा खाना खाएकै कारण भारतीयहरु स्लो प्वाइजनिङ्गको शिकार हुँदै गएको निष्कर्ष निकालेका थिए । पाचन शक्ति कमजोर भएका, विभिन्न रोग लागेका मानिस, बालबालिका तथा बृद्धवद्धा यसका सबैभन्दा बढी जोखिममा पर्ने गरेको देखिएको छ ।
