६ साउन, काठमाडौं । आज काठमाडौंबाट प्रकाशित सबैजसो राष्ट्रिय दैनिकले बिहीबारको मन्त्रिपरिषद बैठकले गठन गरेको निर्वाचन क्षेत्र निर्धारण आयोगको समाचारलाई फ्रन्टपेजमा प्रमुखताका साथ प्रकाशित गरेका छन् ।
यसका अलावा भारतको राष्ट्रपति पदमा रामनाथ कोविन्द निर्वाचित भएको समाचारलाई पनि सबैजसो राष्ट्रिय दैनिकले प्रमुख समाचार बनाएका छन् ।
आजको कान्तिपुर दैनिकले निर्वाचन क्षेत्र निर्धारण आयोगका अलावा भूकम्पपछि पुनर्निर्माण थालिएको गोरखा दरवारको ठूलो तस्वीर प्रकाशन गरेको छ भने कर्मचारी स्थानीय तहमा जान नमानेको समाचारलाई पनि प्राथमिकता दिएको छ ।
त्यस्तै नयाँ पत्रिका दैनिकले ‘९३ प्रतिशत भूकम्पपीडित तेस्रो बर्खामा पनि टहरामै’ शीर्षकमा मूख्य समाचार बनाएको छ ।
सिंहदरबारभित्र आइएनजिओको ९० अर्व शीर्षकमा आजको नागरिक दैनिकले मूख्य समाचार प्रकाशन गरेको छ ।
आजको अन्नपूर्ण पोष्टले करोडौं खर्चिएर भत्काइएका छाउ गोठहरु पुनः ठडिन थालेको समाचारलाई प्राथमिकता दिएको छ । पछिल्ला केहि अंकदेखि अन्नपूर्णले लगातार छाउ कुप्राथाबारेको खोज समाचार प्रकाशन गरिरहेको छ ।
