११ साउन, गुल्मी । आर्थिक वर्ष २०७३/०७४ मा जिल्लामा सवारी दुर्घटनामा परी ११ जनाको मृत्यु भएको छ । सवारी दुर्घटनामा परी ७ जना पुरुष, ३ जना महिला र १ जना वालकको मृत्यु भएको हो ।
दुर्घटनामा परी २६ जना गम्भीर घाइते र १६ जना सामन्य घाइते भएका छन् । सवारी दुर्घटनामा परी मृत्यु हुनेको संख्या पनि अघिल्लो आर्थिक वर्षभन्दा कम हो ।
आर्थिक वर्ष २०७२/०७३ मा २८ वटा सवारीसाधन दुर्घटनामा परेका थिए । दुर्घटनामा १९ जनाको मृत्यु भएको थियो भने ३७ जना गम्भीर र १४ जना सामान्य घाइते भएका थिए ।
आर्थिक वर्ष २०७३/०७४ मा २१ वटा सवारीसाधन दुर्घटनामा परेको जिल्ला ट्राफिक कार्यालय गुल्मीले जनाएको छ ।
ट्रक २ वटा, बस २ वटा, जीप ७ वटा मोटरसाइकल ३ वटा, ट्याक्टर ७ वटा गरी २१ वटा सवारी साधन दुर्घटनामा परेका छन् । यो अघिल्लो आर्थिक वर्ष भन्दा कम हो ।
५ हजार सवारीसाधनलार्इ कारवाही, ३२ लाख राजश्व संकलन
यसैबीच ट्राफिक नियम मिच्नेलाई कार्वाही गर्दा गुल्मीमा ३२ लाख १ हजार राजश्व संकलन भएको छ ।
आर्थिक वर्ष २०७३/०७४ मा यस अघिको आर्थिक वर्ष भन्दा दोब्बर बढीले राजश्व संकलन भएको छ जिल्ला ट्राफिक प्रहरी कार्यालय गुल्मीले जानकारी दिएको छ ।
जिल्लामा एक वर्षको अन्तरालमा ट्राफिक नियम मिच्ने ५ हजार २९२ सवारीसाधन चालक कारवाहीमा परेको जिल्ला ट्राफिक कार्यालय गुल्मीका हवल्दार देबिप्रसाद पौडेलले जानकारी दिए ।
जिल्ला सबैभन्दा बढी मोटरसाइकल र जीप कार्वाहीमा परेका छन् । नियम उलंघन गर्ने मोटरसाइकल चालकहरुबाट मात्रै १३ लाख र जीपबाट १० लाख राजश्व संकलन भएको ट्राफिकले जानकारी दिएको छ ।