१३ साउन, काठमाडौं । रक्षामन्त्री भिमसेनदास प्रधानले काठमाडौं-निजगढ द्रुतमार्ग निर्माणका लागि आवश्यक विष्फोटक पदार्थ भारतबाट निर्यात गर्नुको विकल्प नरहेको बताएका छन् ।
प्रचण्ड नेतृत्वको सरकारले द्रुतमार्ग निर्माणको जिम्मा नेपाली सेनालाई दिने निर्णय गरेको थियो । हाल नेपाली सेना द्रुतमार्ग निर्माणको काममा खटिएको छ ।
शुक्रबार काठमाडौंमा आयोजित साक्षात्कारमा नवनियुक्त रक्षामन्त्री भिमसेनदास प्रधानले काठमाडौं-निजगढ द्रुतमार्ग निर्माणका लागि आवश्यक विष्फोटक पदार्थ भारतबाट ल्याइने बताए ।
सरकारले ७ वटै प्रदेशमा नेपाली सेनाको पृतनापति कार्यालय स्थापना गर्ने तयारी पनि गरेको रक्षामन्त्री प्रधानले जानकारी दिए । काठमाडौं उपत्यकामा भने छुट्टै पृतनापति कार्यालय रहने छ । संघीयता कार्यान्वयन गराउन सबै प्रदेशमा नेपाली सेनाको पृतनापति कार्यालय स्थापना गर्न लागिएको मन्त्री प्रधानले बताए ।
रक्षामन्त्री प्रधानले निर्वाचनलाई शान्तिपूर्ण रुपले सम्पन्न गर्न नेपाली सेनाको भूमिका महत्वपूर्ण हुने पनि बताए ।
