७ भदौ, नयाँदिल्ली । भारत भ्रमणमा रहेका प्रधानमन्त्री शेरबहादुर देउवा र भारतीय सकमक्षी नरेन्द्र मोदीबीच बुधबार साँझ नै भेटवार्ता भएको छ। यसलाई ‘वार्मअप’ भेट भनिएको छ ।
प्रधानमन्त्री देउवा पाँच दिने भारत भ्रमणका क्रममा बुधबार नयाँदिल्लीमा पुगेका छन् । उनी दिल्लीस्थित नेपाली दूतावासमा पुगेर प्रवासी नेपालीहरुलाई छोटो सम्बोधन गरे ।
बिहीबार विहान राष्ट्रपति भवनमा गार्ड अफ अनरको सम्मान लिएपछि मात्र औपचारिक भेटवार्ता सुरु हुनेछ ।
तर, त्यसअघि नै भारतीय प्रधानमन्त्री मोदीले नेपाली समकक्षी देउवालाई ‘वार्मअप’ मिटिङको प्रस्ताव गरे । सोही अनुसार भारतीय प्रधानमन्त्री मोदी र देउवावीच बुधबार साँझ नै भेट भएको हो । मोदी र देउवाबीच सेभेन रेसकोर्स रोडस्थित मोदी निवासमा करिब २०-२५ मिनेट कुराकानी भएको छ ।
भेटपछि मोदीले ट्वीटरमार्फत् भनेका छन्, ‘निकटको साथी नेपालको प्रधानमन्त्री शेरबहादुर देउवा जीलाई भेट्दा निकै खुसी लागेको छ । भोलि थप व्यापक वार्तालाप हुनेछ ।’
भारतका लागि नेपाली राजदूत दीपकुमार उपाध्यायले अनलाइनखबरलार्इ भने, ‘भोलि औपचारिक छलफल हुन्छ । त्यो भन्दा अगाडि कसरी राजनीतिक तहबाट के गर्न सकिन्छ भन्नेछ ।’
उनले यसलाई ‘वार्मअप’ भेट भनेका छन् ।
[sam_list] प्रधानमन्त्री देउवा र मोदीबीच भोलि हैदराबाद हाउसमा ३० मिनेट वान टु वान भेटवार्ता गर्ने कार्यतालिका छ । लगतै दुई देशको प्रतिनिधिमण्डलबीच एकघन्टा वार्ता हुनेछ र केही सम्झौतामा हस्ताक्षर हुनेछ ।
दिल्ली झरेपछि देउवा र पत्नी आरजु राष्ट्रपति भवन गएका थिए, जहाँ उनी विशिष्ट पाहुनाको रूपमा भ्रमण अवधिभर बस्नेछन् । भ्रमण दलका अरू सदस्यहरू भने ताज होटलमा बस्न गए । त्यसपछि देउवा बिरामी अवस्थामा भएका डिपी त्रिपाठीलाई भेट्न गए ।
दूतावास आउनुपूर्व नै देउवाले त्रिपाठीलाई भेटेर स्वास्थ्य अवस्थाबारे जानकारी लिएका थिए । त्यसपछि दूतावास पुगेर ज्ञापनपत्र बुझ्दै गर्दा उनलाई समकक्षी मोदीबाट अकस्मात चियापानको निम्तो आएको थियो ।
भारतीय समकक्षी मोदीको औपचारिक निमन्त्रणमा प्रधानमन्त्री देउवा ४८ सदस्यीय टोलीको नेतृत्व गर्दै बुधबार नयाँदिल्ली आएका हुन् । उनी शनिबार स्वदेश फर्किने कार्यक्रम छ।
थप समाचार
देउवालाई दिल्लीमा विदेशमन्त्रीको स्वागत
बैंकिङ सुविधा दिलाइदिन प्रधानमन्त्रीसामू प्रवासी नेपालीको माग