Online Khabar

सम्धीलाई काखी च्याँपेपछि इरानी राष्ट्रपति अहमदिनेजादलाई ७४ कोर्रा !

suresh — Sat, 18 May 2013 16:02:25 +0000

मुस्लिम मुलुकहरुमा कानुन उल्लंघन गर्ने मान्छेलाई कोर्रा हानेर सजाय दिनेगरेका समाचारहरु बेलाबेलामा सुन्ने गरिएको छ । यसरी कोर्रा खानेमा केवल सर्वसाधारण मात्र होइन कहिलेकाहीँ ठूलै मान्छे पनि पर्छन् । अब यस्तो कोर्राको सजाय खाने पालो इरानी राष्ट्रपति महमूद अहमदीनेजादको आएको छ ।

समाचार अनुसार अहमदीनेजाद विरुद्ध चुनाव दर्ता कार्यालयमा आफ्ना प्रमुख सल्लाहाकार सँग मिलेर नियम कानून उल्लंघन गरेको आरोप लागेको छ । यस्तो आरोप प्रमाणित भएमा अधिकतम ६ महिनाको जेल वा ७४ कोर्राको सजाय हुनेछ । पछिल्ला केही वर्षयता इरानमा अहमदीनेजाद र सत्ताधारी धार्मिक नेताहरुका बीचमा चलिरहेको संघर्षको रुपमा पछिल्लोपटक सार्वजनिक भएको यो घटनालाई लिइएको छ ।

इरानको संवैधानिक निगरानीकर्ता गार्जियन काउन्सिलले अहमदीनेजादमाथि उपयुक्त अभियोग पेश गर्ने बताएको छ । गएको आइतबार अहमदीनेजादले पद र शक्तिको दुरुपयोग गर्दै आफ्ना मुख्य सल्लाहाकारसँग मिलेर उनलाई आगामी राष्टपतिय चुनावका लागि उमेद्धारको रुपमा दर्ता गराएका थिए । इरानको संवैधानले एउटै व्यक्ति तेश्रो पटक प्रधानमन्त्री हुन नपाउने व्यवस्था गरेकाले जुन १४ मा हुने चुनावमा अहमदीनेजाद उठ्न नपाउने भएकाले आफ्ना उत्तराधिकारीका रुपमा इस्फान्दियार रहिम मसाइलाई खडा गरेका छन् ।

गार्जियन काउन्सिलका प्रवक्ताका अनुसार अहमदीनेजादलाई उक्त आरोपमा न्यायालय समक्ष पेश हुनुपर्ने स्थिति आउनसक्छ । उनका अनुसार मसाइलाई चुनाव दर्ता कार्यालयमा सँगै लिएर गई अहमदीनेजादले सार्वजनिक कोषको दुरुपयोग गरेका छन् र कानून मिचेका छन् । स्मरण रहोस् मसाइ र अहमदीनेजाद सम्धी सम्धी हुन् । अहमदीनेजादका छोराले मसाइकी छोरी बिहे गरेका छन् ।

जिमेलबाटै पैसा पठाउन सकिने (तरिकासहित)

rajkumar — Sat, 18 May 2013 16:00:09 +0000

इमेलबाट विभिन्न फाइल अट्याच गरेर तस्वीर, भिडियो तथा अन्य इलेक्ट्रोनिक फाइल पठाउने गरिएको छ । तर अब इमेलबाट फाइलमात्र होइन पैसा पनि पठाउन सकिनेछ । गुगलले आफ्नो इमेल सेवा जिमेलका माध्यमबाट पैसा समेत पठाउन सकिने सेवा सुरु गर्ने बताएको छ ।

सुरुमा यो सेवा अमेरिकामा लागु गरिने गुगलको भनाइ छ । जिमेलमा यो सेवाको प्रयोग गुगल वालेटका साथ गरिनेछ । यसका लागि वालेटलाई प्रयोगकर्ताको बैंक अकाउण्टसँग लिंक गरिनेछ । प्रयोगकर्ताले चाहेमा आफ्नो जिमेल अकाउण्टलाई आफ्नो डेबिट तथा क्रेडिट कार्डसँग पनि जोड्न सक्नेछन् । यस्तो अवस्थामा हरेक चोटी पैसा आदानप्रदान गर्दा त्यसको झण्डै ३ प्रतिशत शुल्क लाग्नेछ ।

अब छिटै यो सेवा अमेरिकी जिमेल प्रयोगकर्ताहरुको लागि उपलब्ध गराइनेछ । १८ वर्ष उमेर पुगेकाहरुले यो सेवा प्रयोग गर्न पाउनेछन् । यदि पैसा प्राप्त गर्नु छ भने आफ्नो अकाउण्टमा यो फिचर एक्टिभेट गर्नुपर्नेछ । स्मरण रहोस् यसअघि पनि केही वेबसाइटहरुले यस्तो अनलाईन रकमआदानप्रदानको सेवा प्रदान गरेका भएपनि त्यो लोकपि्रय बन्ने सकेन । तर जिमेलका प्रयोगकर्ता धेरै भएकाले जिमेलले यस्तो सेवा सुरु गरेमा त्यो सफल हुने विश्वास गरिएको छ ।

कसरी पठाउने पैसा ?

यसका लागि नयाँ इमेल (न्यू मेल ) अर्थात् कम्पोजमा क्लिक गर्नुपर्छ र रकम पाउने वालको ठेगाना लेख्ने । त्यसपछि अट्याचमेन्ट बटनमा क्लिक गर्ने र त्यहाँ दिइएको डलरको चिन्हमा क्लिक गर्ने । अनि पठाउने रकमको अंक थिच्ने, त्यसो गर्दा कार्ड वा अकाउण्टबाट पठाउने रकम तय गर्न सकिन्छ र सेण्ड गरेपछि उपरोक्त रकम प्रापकले प्राप्त गर्छ ।

के हो गुगल वालेट ?

गुगल वालेटको फिचर जिमेल एकाउण्टमा हुन्छ । कतिपय मुलुकमा यो फिचरमा आफ्नो क्रेडिट कार्ड वा डेबिट कार्डको विस्तृत विवरण हाल्न सकिन्छ र एप्स तथा गुगल स्टोरबाट केही प्रडक्ट खरीद गर्नुपर्दार् गुगल वालेटमा दर्ज गरिएको कार्ड नम्बरवाला अकाउण्टबाटै रकम भुक्तान हुन्छ ।

ढुंगे पहरो मुनिको सुन्दर सहर (फोटो फिचरसहित)

rajkumar — Sat, 18 May 2013 15:56:54 +0000

हामीकहाँ विकाशका पूर्वाधार निर्माणमा भौगोलिक असहजता, डाँडाकाँडा, भिरपाखा आदिले अवरोध गर्‍यो भनिन्छ । तर यदि दृढ इच्छा भयो भने विकाश गर्न कुनै भौगोलिक विषमताले छेक्दैन भन्ने कुराको उदाहरण हो स्पेनको बोडेगास सहर ।

यो सहर भिमकाय चट्टानी पहरो मुनि लुकेको छ भन्दा फरक नपर्ला । चट्टानको ओतमा घर बनेका छन् । मानौँ चट्टानले घरलाई थिँचिरहेको छ । झण्डै तिन हजार जना मान्छे बस्ने यो आदिम युगको जस्तै देखिने सहरमा घरहरु भने आधुनिक पाराका, सेता र चिटिक्कका छन् । घरहरुमा भित्री पर्खाल प्राकृतिक चट्टानकै छ । त्यसैले केवल बाहिरी पर्खाल ठड्याइएको छ ।

धेरैमा छानोको काम पनि पहरोले नै गरेको छ । कान्डिज क्षेत्रको उत्तरपूर्वमा पर्ने यो सहर रियो त्रेजो नदिको साँघुरो गल्छी क्षेत्रको हो । यो वस्ती निकै पुरानो तथा ऐतिहासिक रहेको बताइन्छ ।

यो सहर वास्तवमै सुविधासम्पन्न छ । यहाँ बार, रेष्टुरेन्ट देखि लिएर विभिन्न खाने परम्परागत तथा आधुनिक परिकार समेत पाइन्छ । यो सहरको पूरा नाम सेटेनिल डी लास बोडेगास हो ।

चुनावी कानुनबारे राष्ट्रपति र मन्त्रिपरिषद् अध्यक्षबीच छलफल

rajkumar — Sat, 18 May 2013 15:38:29 +0000

४ जेठ, काठमाडौं । राष्ट्रपति डा. रामवरण यादव र मन्त्रिपरिषद् अध्यक्ष खिलराज रेग्मीबीच शनिबार भेटवार्ता भएको छ । शीतलनिवासमा साँझ भएको भेटमा उहाँहरुबीच संविधानसभा सदस्य निर्वाचन सम्बन्धी कानूनी व्यवस्थालाई चाँडो टुङ्गयाई निर्वाचन मिति घोषणा गर्ने लगायतका विषयमा छलफल भएको थियो ।

भेटमा मन्त्रिपरिषद् अध्यक्ष रेग्मीले सरकारले निर्वाचन वातारण निर्माणका लागि गरिरहेका प्रयासका बारेमा अवगत गराउनुभएको थियो । साथै सरकारले गरेको सर्वदलीय बैठक र विभिन्न राजनीतिक दलहरुसँग भएका छुट्टाछुट्टै छलफलमा प्रस्तावित संविधानसभा सदस्य निर्वाचन अध्यादेशका केही प्रावधानहरुका बारेमा विभिन्न राजनीतिक दलले राखेका मागहरुका बारेमा पनि रेग्मीले राष्ट्रपतिलाई जानकारी गराउनुभएको थियो ।

भेटमा मुख्यतस् समानुपातिक प्रतिनिधित्व प्रणाली अन्तर्गत राजनीतिक दलले सदस्यको सिट प्राप्त गर्न निर्वाचनमा कूल सदर मतको न्यूनतम १ प्रतिशत मत प्राप्त गर्नुपर्ने प्रावधान, समानुपातिक निर्वाचनको सिट संख्या र त्यसमा विभिन्न वर्ग, समुदायको प्रतिनिधित्वको सुनिश्चितता लगायतका विषयमा कुराकानी भएको थियो ।

छलफलमा राष्ट्रपति यादवले राजनीतिक दलहरु चाँडै सहमतिको बिन्दूमा पुगुन् र सरकार पनि ठोस् निष्कर्षमा पुगो्स् भन्ने विचार व्यक्त गर्नुभएको थियो । मन्त्रिपरिषद् अध्यक्ष रेग्मीले निर्वाचनमा अधिकतम् राजनीतिक दलको सहभागिता र समावेशीता सुनिश्चित गर्दै निर्वाचन मिति घोषणा गर्न सरकार चाँडै निष्कर्षमा पुग्न प्रयत्नशील रहेको कुरा बताउनुभयो । रेग्मीले यस सम्बन्धमा राष्ट्रपतिबाट आवश्यक पहल र सहयोगको अपेक्षा गरेको कुरा पनि बताउनुभएको रेग्मीका प्रेस संयोजक राजेन्द्रप्रसाद पाण्डेयले जानकारी दिनुभयो ।

केपी ओलीले भने-एमाओवादी फोहोर बटुल्ने भाँडो

rajkumar — Sat, 18 May 2013 15:15:12 +0000

४ जेठ, काठमाडौं । उर्मिला अर्याल र नायिका रेखा थापाले पेरिसडाँडामा टीका लगाएर एमाओवादीमा प्रवेश गरेकै दिन शनिबार एमाले नेता केपी ओलीले कपनस्थित एउटा पार्टी प्यालेसमा तीन एमाओवादी कार्यकर्तालाई टीका लगाउँदै भन्नुभयो-’एमाओवादी फोहोरमैला थुपार्ने ‘डम्पिङ साइड’ भयो । गाउँखाने कथामा जस्तो समाजका राम्रा मान्छेजति अब जम्मै एमालेका, काम नलाग्ने पत्करजति जम्मै एमाओवादीका !

पार्टी छाडेर एमाओवादी प्रवेश गर्नुभएकी निवर्तमान पोलिटब्यूरो सदस्य उर्मिला अर्याललाई नेता ओलीले पत्कर र किर्नोको संज्ञा दिनुभयो । ‘किर्नो पनि अघाएपछि चुप लागेर बस्छ, यी मान्छे कस्ता ? जति खाए पनि चित्त नबुझ्ने ।’ ओलीले अर्याललाई संकेत गर्दै भन्नुभयो-’दुई दुईपल्ट सांसद बनाइयो, दुईपल्ट मन्त्री बनाइयो । केन्द्रीय सदस्य र पोलिटब्यूरो सदस्य बनाइयो, तर यति खाँदा पनि चित्त नबुझ्ने कस्तो मान्छे ?’

ओलीले एमाले अर्याद भन्दा अघि एमाओवादीमा प्रवेश गरेका रामचन्द्र झालाई पत्कर बताउनुभयो । ‘रामचन्द्रजस्तो पत्करलाई बोकेर एमाओवादीहरु हिँडेका छन् । यो माओवादी त फोहोर बटुल्ने भाँडोजस्तो पो भयो ।’

नेकपा एमालेको कपन गाउँ कमिटीले मिलनचौकस्थित एक पार्टी प्यालेसमा शनिवार पार्टी प्रवेश कार्यक्रमको आयोजना गरी केपी ओली र विद्या भण्डारी आउने प्रचार गरेको थियो । तर, तोकिएको समयभन्दा आधाघण्टा ढीलो ओलीमात्रै हुण्डाइ कार चढेर कार्यक्रमस्थल पुग्नुभयो । कार्यक्रम स्थलमा ओलीले कपाल र मुन्द्रा पालेकासमेत गरी ३ सय १२ जना युवा युवतीलाई माला र अवीर लगाएर पार्टीमा प्रवेश गराउनुभयो । यसरी प्रवेश गर्नेहरुमा तीनजना एमाओवादी कायृकर्तालाइृ भने भाषण गर्न लगाइएको थियो । मोरंगका बालकृष्ण ढकाल, सिन्धुलीका नवराज घिमिरे र ओशोको माला लगाएकी कञ्चन पूडासैनीले आफूहरु बाध्यताले माओवादीमा लागेको बताएका थिए । तीनैजनाले आफूहरु पूर्व एमाले कार्यकताृ रहेको बताउँदै घर फर्केको बताउँदा हलमा रहेका सयौंले ताली बजाएका थिए ।

कार्यक्रममा नवप्रवेशीलाई सम्बोधन गर्दै ओलीले भन्नुभयो-’हामी तपाईहरुलाई माओवादीले जस्तो रक्तचन्दन ओसार्न लगाउँदैनौं । उनीहरुले जस्तो तपाईहरुलाई लडाकू देखाएर राज्यको अर्बौं भ्रष्टाचार गर्दैनौं । तपाईहरुलाई भ्रष्टाचार गर्न र ठेक्कापट्टा कब्जामा लगाउँदैनौं । टावरहरु ठ्याउन पनि लगाउँदैनौं । तपाईहरुले माला लगाएको अर्थ देशको विकासमा सहभागी हुनका लागि हो ।’

एमाओवादी कहाँ खस्छ, थाहा छैन

नेता ओलीले सर्वहाराको नेता प्रचण्डले आफ्नो छोराले ‘हिमाल चढ्छु बा’ भन्दा लैजान त छामेरा भन्दै राज्यकोषबाट दुई करोड रुपैया दिएको बताउनुभयो । ‘लडाकूका जिऊबाट अझैसम्म छर्रा निकाल्न सकेको छैन, आफ्ना छोरालाई सगरमाथा चढ्न दूईकरोड दिन्छन् ।’ ओलीले भन्नुभयो-’काठमाडौंमा ठडिएका अग्ला अग्ला टावर, मेडिकल कलेज र रियल स्टेटहरु कसका हुन् ? अब चाँडै थाहा हुन्छ ।’

मन्तव्यका क्रममा एमाले नेता ओलीले थप्नुभयो-’प्रचण्डपथ सकियो । महान जनयुछ सकियो, महान जनसेना पनि सकिए, एमाओवादीले नौलो जनवाद पनि छाड्यो । नौलो जनवाद नमान्ने हो भने कुन जनवाद मान्ने ? एमाओवादीसँग अब कुनै सिद्धान्त छैन । यो आकाशबाट झरेको छ, कहाँनेर र्झछ पत्तो छैन ।’

नेपालमा समावेशी हुँदैन

एमाले नेता ओलीले नेपालमा एउटामात्रै जाति र भाषाको बहुमत नभएकाले समावेशीको सिद्धान्त गलत भएको बताउनुभयो । यूरोमा एकजाति र एक भाषाको बाहुल्य रहेकाले अल्पसंख्यकलाई समावेश गर्न ल्याइएको सिद्धान्त नेपालमा लागू नहुने उहाँले बताउनुभयो । ‘नेपालमा महिला ५१ प्रतिशत छन्, अनि उनीहरुलाई समावेशी हुन्छ ? समावेशी भनेको त थोरै भएकालाई गर्ने हो ।’ उहाँले भन्नुभयो ।

थ्रेसहोल्ड लागू हुनैपर्छ

कार्यक्रमपछि पत्रकारसँग बोल्दै नेता ओलीले आगामी निर्वाचनमा थ्रेसहोल्डको प्रावधान लागू हुनै पर्ने एमालेको अडान रहेको बताउनुभयो । उहाँले संविधानसभाको चुनाव आगामी मंसिरमा नभएर कात्तिकमा हुनुपर्ने बताउनुभयो । चुनावको वातावरण बन्दै गएको र दलहरु सहमतिको नजिक पुगेको उहाँको तर्क थियो । ‘एमालेका मान्छे पार्टी छाडेका छाड्यै छन्, अब एमाले सकियो रे त ?’ पत्रकारको प्रश्नमा ओलीले एकछिन हाँसेर जवाफ दिनभयो – ‘यै कपनमा हेर्नोस् न । तीनजना माओवादीमा गएका रहेछन्, ३ सय १२ जना आज एमालेमा प्रवेश गरे ।’

काठमाडौं ४ मा सबैको ध्यान

कपन काठमाडौंको निर्वाचन क्षेत्र नं ४ मा पर्छ । विगतको संविधानसभामा सुप्रभा घिमिरेले १३ हजार मत ल्याएर जितेको यस क्षेत्रमा विद्या भण्डारीले ९ हजार मत ल्याउनुभएको थियो भने एमाओवादी तेस्रो स्थानमा सीमित भएको थियो । यसपालिको चुनावमा एमालेका युवा नेता योगेश भट्टराईले ४ नम्बर क्षेत्रबाट लड्न मन गरेको कार्यकर्ताहरु बताउँछन् । तर, कांग्रेसका गगन थापाको रोजाइ पनि यही क्षेत्रमा रहेको बताइन्छ । एमाओवादीबाट भने पूर्व लडाकू कमान्डर पासाङको नाम चर्चामा छ ।

फ्रान्समा समलैंगिक विवाहलाई कानूनी मान्यता

rajkumar — Sat, 18 May 2013 15:11:07 +0000

४ जेठ, काठमाडौं । फ्रान्सका राष्ट्रपति फ्रान्स्वा ओलाण्डले समलैंगिक विवाहलाई अनुमति दिने विधेयकमा हस्ताक्षर गर्नु भएको छ । यससँगै फ्रान्स समलैंगिक विवाहलाई कानूनी मान्यता दिने युरोपको नवौं र विश्वको १४ औं देश बनेको छ ।

यसअघि शुक्रबार संवैधानिक परिषद्ले दक्षिणपन्थी विपक्षी पार्टी यूएमपीको विरोध खारेज गरेको थियो । समान लिंग भएकाहरुको विवाह संवैधानिक मान्यता विपरित नभएको भन्दै परिषद्ले यो देशको सम्प्रभुता विपरित नभएको पनि बताउको छ ।

फ्रान्समा समलैंगिक समूहले नयाँ कानुनको खुसी जनाएको छ भने हजारौं जोडी विवाहको तयारीमा छन् ।

उर्मिला अर्याललाई ओलीको प्रश्न-जति खाँदा पनि पुगेन ?

rajkumar — Sat, 18 May 2013 13:19:37 +0000

४ जेठ, काठमाडौं । नेकपा एमालेका नेता केपी शर्मा ओलीले उर्मिला अर्यालको एमाओवादी प्रवेशलाई हरियो रुखबाट एक-दुई पहँलो पात खसेको संज्ञा दिनु भएको छ ।

कपनमा शनिबार आयोजित पार्टी प्रवेश कार्यक्रममा नेता ओलीले जति खाँदा पनि नअघाएको भन्दै अर्यालको आलोचना गर्नुभयो । किर्नो पनि अघाएपछि सन्चोले बस्छ, तर जति खाँदा पनि नअघाउने कस्तो हो यो’ अर्याललाई लक्षित गर्दै नेता ओलीले भन्नुभयो-’दुई पटक मन्त्री बनाइयो । दुई पटक सांसद बनाइयो । केन्द्रीय सदस्य, पोलिटव्यूरो सदस्य बनाइयो, यत्ति गर्दा पनि पुगेन ?’

एमाले परित्याग गर्नेहरुलाई रुखबाट खसेको पहेँलो पात भन्दै उहाँले भन्नुभयो-’यस्ता पातहरुलाई लिएर प्रचण्ड एमाले सिध्यो भन्दै हिड्छन् ।’ कपनबाट ३ जनाले एमाले परित्याग गर्दा ३ सय १२ जना एमाले प्रवेश गरेको भन्दै नेता ओलीले कहाँ एमाले सकियो भनि प्रश्न गर्नुभयो ।

एमाओवादीले महान जनमुक्ति सेना, प्रचण्डपथ सबै छाडिसकेको भन्दै उहाँले भन्नुभयो-’आकासबाट झरिसकेको छ । तर कहाँ खस्छ थाहा छैन ।’

राप्रपा र राजपाको महाधिवेशनः आलोपालो नेतृत्व अस्वीकार

rajkumar — Sat, 18 May 2013 12:52:28 +0000

४ जेठ, काठमाडौं । कार्यकर्ताले सामूहिक नेतृत्वको प्रस्ताव अस्वीकार गरेपछि राजधानीमा जारी राष्ट्रिय प्रजातन्त्र पार्टी र राष्ट्रिय जनशक्ति पार्टीको एकता महाधिवेशनको बन्दसत्र प्रभावित भएको छ ।

बन्दसत्रमा परशुराम खापुङले आलोपालो नेतृत्व गर्ने प्रस्तावसहितको विधान संशोधनको प्रस्ताव पेश गर्नु भएको थियो । तर, सहभागीहरुले त्यसविरुद्ध नाराबाजी गरेपछि बन्दसत्र आइतबार विहान ८ बजेसम्मका लागि स्थगित भएको छ ।

प्रस्तावमा शीर्ष चार नेता रहने उच्चस्तरीय राजनीतिक कार्यसम्पादन समिति गठन गर्ने र आलोपलो नेतृत्व गर्ने उल्लेख छ भने १ अध्यक्ष, ३ उपाध्यक्ष, ३ महामन्त्री लगायतका पदाधिकारीसहितको १ सय ७ सदस्यीय केन्द्रीय समिति बनाउने प्रस्ताव गरिएको छ ।

एकतापछि पार्टीको नाम राष्ट्रिय शक्ति प्रजातन्त्र पार्टीको प्रस्ताव गरिएपनि कार्यकर्ताको विरोधपछि राष्ट्रिय प्रजातन्त्र पार्टी नै राख्न सुझाव आएको छ । शुक्रबारबाट सुरु भएको एकता महाधिवेशनमा २ हजार २ सय बढी नेता कार्यकर्ताको सहभागिता रहेको छ ।

मन भुलाउने भेडेटार (फोटोफिचर)

tanka — Sat, 18 May 2013 12:32:32 +0000

शब्द/तस्वीर : गोपाल दाहाल

उत्तरतिर मुस्कुराइरहेको सेतो हिमाल । दक्षिणतिर समथर तराई र सप्तकोशीको रमणीय दृश्य । पहिलोचोटिमै पाहुनालाई आकषिर्त गर्छ धनकुटाको भेडेटारले । १६ किलोमिटर तल धरानमा हपक्क गर्मी हुँदा पनि भेडेटार ठन्डा हुन्छ, त्यसैले धरानेहरु गर्मी लाग्यो कि भेडेटार चढिहाल्छन्, काठमाडौंका मानिसहरु शीतल खोज्न नगरकोट गएजस्तै ।

विं.सं. ०४०मा नेपाल भ्रमणमा आएका बेला बेलायतका युवराज चाल्र्ससमेत भेडेटारमा पुगेर अग्लो डाँडो चढे । त्यसबेलादेखि भेडेटारमा रहेको अग्लो चुचुरोको नाम नै चाल्स प्वाईन्ट राखिएको छ । जहाँ हाल ३० फिट जति अग्लो टावरसमेत बनाइएको छ ।

भेडेटारको टावर

धरान धनकुटा सडक बन्नुअघि निर्जन पहाडका रुपमा रहेको भेडेटारमा पहिला भेडा चराउने खर्क थियो । तर, अहिलेको भेडेटारमा भेडा त कहाँ हुनु, मान्छे नै मान्छेको बथान भेटिन्छ । घुम्न आउनेहरुको उत्तिकै चाप, होटल रेष्टुरेन्ट चलाउनेको उस्तै ।

बढ्दो चापसँगै भेडेटारको जमीनको भाउ छोइनसक्नु आकाशिएको छ । वरिपरिका हरिया डाँडासमेत धरान, बिराटनगरका व्यापारी, मारवाडीले किनिसकेका छन् । भेडेटारको सुन्दरताले सबैलाई मोहनी लगाएको छ । सुनसरी र धनकुटाको सीमामा पर्ने भेडेटार समुद्री सतहदेखि १४ सय ३० मिटरको उच्च पहाडी क्षेत्रमा अवस्थित छ । भेडेटारबाट उत्तरतिर कञ्चनजंगा, मकालुलगायतका हिम श्रृंङखलाको रमणीय दृश्य, दक्षिणतिर सप्तकोशीसँगै तराईका फाँटहरु हेर्न पर्यटकहरु आउने गर्छन् । त्यसबाहेक चिसो मौसमले पर्यटक तान्ने गरेको छ ।

पूर्वी नेपालको सुन्दर सहर धरानदेखि १६ किलोमिटर उत्तरमा पर्ने भेडेटार धरानदेखि नजिकै रहेर पनि हिमाली भेगको जस्तो चिसो हावापानी पाइने हुनाले यो ठाउँले पर्यटकको मन लोभ्याउँछ ।

केहीबर्ष यता भेडेटार वरपर पनि उस्तै रमणीय स्थलहरु चर्चामा आइरहेका छन् । दुई बर्षअघि भेडेटार गाविसकै नाम्जे बजारलाई सिएनएनले नसुनिएका विश्वका उत्कृष्ठ १२ गन्तव्यको सूचीमा राख्यो । अर्गानिक गाउँका रुपमा चर्चित नाम्जेमा विश्वका विभिन्न देशका आर्किटेक्चरले बनाएको आत्माघर पर्यटकको राम्रो गन्तव्य बनेको छ । नाम्जे डाँडामा चिहानका ढुङ्गाले बनाईएको आत्माघरभित्रको सिसामा आकाश हेर्दै दिवंगतको सम्झना गर्नेहरु धेरै भेटिन्छन् ।

भेडेटारबाट ९ किलोमिटर तल झरेपछि पुगिने नमस्ते झर्नापनि कम्ति आकर्षक छैन । माथिबाट छङछङ बग्दै झर्ने झरनामा पूर्वका विराटनगर, धरान, इटहरीतिरबाट नुहाउन पुग्नेहरुको भीड नै लाग्छ । भेडेटारनजिकै रहेको पाथिभरा मन्दिर पनि धार्मिक आस्था राख्नेहरुका लागि निक्कै प्रशिद्ध छ । यसरी भेडेटार प्राकृतिक तथा धार्मिक पर्यटकका लागि आकर्षकस्थल बनिरहेको छ । भेडेटारको सुन्दरता सबैलाई मोहित पार्नेखालको छ ।

हेर्नुहोस् भेडेटार, नाम्जे, नमस्ते झरना र पाथिभरा मन्दिरका तस्वीर

यार्सागुम्बा टिप्न गएका ७ हिमपहिरोमा परे

rajkumar — Sat, 18 May 2013 12:12:21 +0000

४ जेठ, काठमाडौं । बझाङको काँडा गाविसको राईढुंगी लेकमा हिउँ पहिरोमा परी ७ जना वेपत्ता भएका छन् । यार्सागुम्बा टिप्न साइपाल हिमाल नजिकैको लेकमा गएका उनीहरु वेपत्ता भएको प्रहरीले जनाएको छ ।

घटनाको विस्तृत विवरण आइनसकेपनि यार्सागुम्बा टिप्न काठमाडौंबाट गएको ९ जनाको टोलीमध्ये २ जना जोगिएको र ७ जना हिम पहिरोमा परेको खबर आएको बझाङ्गका प्रहरी नायव उपरिक्षक उदयराज तामाङ्गले जानकारी दिनुभयो ।

उहाँका अनुसार स्थानीय राजमल बोहराले खबर गरेपछि प्रहरी घटनास्थलतर्फ गएको छ । घटनास्थ्ाल पुग्न २ दिन लाग्ने भएकाले थप विवरण आउने समय लाग्ने डिएसपी तामाङ्गले बताउनुभयो ।