म त रेखाको फ्यान

बामदेव गौतम, उपाध्यक्ष, नेकपा एमाले

खरो स्वभाव र प्रष्ट विचारका धनी बामदेव गौतमलाई धेरैले राजनीतिज्ञको रुपमा मात्र चिन्दै आएका छन । नेपाल कम्युनिष्ट पार्टी एमालेका उपाध्यक्ष समेत रहनु भएका नेता गौतम एक कुशल गीतकार, कवी भएको कुरा चाही धेरै कमलाई मात्र थाहा होला । उप प्रधानमन्त्री समेत भैसक्नु भएका नेता गौतमद्धारा रचित गीती संग्रहको एल्वम यसअघि नै बजारमा आई सकेको छ । फुर्सदमा गीत कोर्ने नेता गौतम अहिले एल्वम निकाल्ने तयारीमा हुनुहुन्छ । यही प्रसंगमा नेता गौतमसँग अनलाइनखबर डट कमले गरेको सिने संगीत वार्ता ।

० जीवनमा हेरेको पहिलो चलचित्र ?

- आमा ।

० कहिले र कँहा हेर्नु भो ?

- वि.स २०२१ सालमा भुमिगत कालमा भारतको गोरखपुरमा हेरेको थिएँ ।

० पछिल्लो पटक कुन चलचित्र हेर्नु भएको थियो ?

- थ्री इडियट्स । मैले आजसम्म हेरेको हिन्दी चलचित्रहरुमध्ये यो निकै उत्कृष्ट लाग्यो ।

० हलमा गएर कि घरमा नै हेर्नुभयो ?

- दिल्ली गएको बेलामा उतैको हलमा सपरिवार हेरियो ।

० नेपाली चलचित्र बढी हेर्नुहुन्छ कि हिन्दी ?

- कुनै फिल्म त्यसरी नै हेर्दिन, तर हिन्दी चलचित्र बढी मनोरञ्जनात्मक हुने भएकाले ती नै बढी हेरिन्छ । असाध्यै राम्रो लागेको फिल्म जुन पनि हेरिन्छ । नेपालीमा पनि कुसुमे रुमाल, बलिदान र लालसलाम हेरेको छु ।

० पछिल्लो समयमा हेरेको नेपाली चलचित्र ?

- बलिदान ।

० नेपाली कलाकार चिन्नुहुन्छ ?

- हाम्रो देशका कलाकारहरुसँग विभिन्न कार्यक्रममा भेट भइरहेको हुन्छ । भुवन के.सी, अशोक शर्मासँग नजिकको सम्बन्ध छ । महिला कलाकारमा रेखा थापा मन पर्छ, म उहाँको फ्यान हुँ । उहाँसँग भेट गर्ने मौका त मिलेको छैन, तर साप्ताहिकमा आउने लवगुरुको प्रतिक्रिया मन पर्छ । गौरी मल्लसँग एक, दुई पटक भेट भएको छ, नेपाली चलचित्र क्षेत्रमा उहाँ मर्यादित र भद्र नायिका हो जस्तो लाग्छ ।

० हिन्दी कलाकार नि ?

- म राजकुमारको अभिनयबाट निकै प्रभावित छु । स्वाभिवानी रुपमा प्रस्तुत हुने उहाँको संवाद त अति नै मन पर्छ । उहाँलाई म सम्मान गर्छु । उहाँको निधन हुँदा म रोएको थिए । ४,५ दिन त किन मरे होला जस्तो लाग्यो ।

० कस्तो बेला चलचित्र हेर्न मन पराउनुहुन्छ ?

- फुर्सदको बेला बढी चलचित्र हेरिन्छ । जुनसुकै चलचित्र भए पनि मनोरञ्जन चाही सबैबाट लिन्छु ।

० विशेष गरी कस्ता चलचित्र मन पराउनुहुन्छ ?

- जस्तो पनि मन पराउछु । तर बढी मन पराएको चाही महाभारत नै हो । महाभारतको ५२ वटा क्यासेट बजारबाट भाडामा ल्याएर लगातार तीन दिन सम्म हेरेको थिए । सात वर्षको हुँदा महाभारत पढेको हुनाले पनि त्यसको प्रभाव परेको हुन सक्छ । नेपालीमा बलिदान, लालसलाम हेरको छु । बलिदान हेर्दा आँखाबाट आँसु पनि आएको थियो ।

० चलचित्र हेर्दा कतिको रुने गर्नुहुन्छ ?

- रुने, हाँस्ने दुवै गर्छु ।

० कस्तो चलचित्र बन्नुपर्छ ?

- यस्तो उस्तो भन्ने छैन । चलचित्र हेर्दासम्म मनोरञ्जन चाही हुनुपर्छ । मैले चलचित्र हेर्दा पूर्णतया मनोरञ्जन लिइ रहेको हुन्छु ।

० चलचित्रले समाज परिवर्तनमा कस्तो भुमिका बहन गर्न सक्छ ?

- खासै प्रभाव पार्छ जस्तो लाग्दैन्, तर नजानिदो पाराले गर्न सक्छ ।

० नेपाली चलचित्रहरुले किन बजार पाउन सकेनन् होला ?

- यस क्षेत्रमा योग्यतम मान्छे नआएर होला । महानायकको उपाधि पाउनु भएका राजेश हमाललाई म सम्मान गर्छु । उहाँले आˆनो जीवन यसैमा समर्पित गरे जस्तो लाग्छ, तर अहिले पनि उहाँ उस्तै भुमिकामा देखिदा अस्वभाविक लाग्छ, जबरजस्ती कला क्षेत्रमा लागे जस्तो लाग्छ ।

० तपाईको व्यक्तित्वलाई झल्काउने किसिमको चलचित्रमा अभिनय गर्न प्रस्ताव आयो भने ?

- अभिनय गर्न सक्छु जस्तो लाग्छ, तर कनफिडेण्ट छैन ।

० गीत, सङ्गीत कतिको सुन्नुहुन्छ ?

- गीत सुन्छु । सङ्गीतमा ज्ञान छैन । तर, सङ्गीत विना गीत बन्दैन ।

० कस्ता गीत मन पर्छ ?

- कलात्मक, भावनात्मक र विचार भएका गीत मन पर्छन । लोकगीत र दोहोरी पनि खुव मन पर्छ ।

० कतिको गाइयो त लोकगीत, लोकदोहोरी ?

- स्वर छैन, त्यसैले खासै गाइएन । गायनतर्फ साधना पनि गर्न पाइएन । राजनीतिमा लाइयो, त्यस्तो मौकै मिलेन, तर दोहोरीतिर गइयो भने गाउन सकिन्छ जस्तो लाग्छ । गीत चाही कोरेको छु ।

० एल्वम पनि निकाल्नु भो ?

- राम्रा संगीतकर्मीको साथ पाएर एल्वम निकालेको हुँ । शक्तिबल्लभ र शम्भुजित बाँस्कोटाले संगीतमा साथ दिनु भयो भने अन्य गायक, गायिकाले पनि गीत गाउनुभयो ।

० रहर मात्र पूरा गर्न हो कि मौका मिले अरु पनि निकाल्नु हुन्छ ?

- होइन, मैले दुई वटा एल्वम निकाल्ने तयारी गरिरहेको छु । व्यस्तता कारण समय मिलेको छैन । संगीतकार शक्तिवल्लभले संगीत तयार भइसकेको बताउनु भएको छ । समय पाउनासाथ त्यसको तयारीमा लाग्छु ।

० गीत बाहेक कविता पनि कोर्नहुन्छ कि ?

- शार्दुल विकृतको छन्दमा कविता कोर्ने गर्थे । अनि गद्य कविता पनि लेखियो । साहित्यिक अध्ययनमा लागेकाले कविता लेखेको हो ।

० एकछिन मनलाई आनन्द दिन गीत मन पर्छ कि सन्देश दिने ?

- सबै किसिमका गीतहरु मन पर्छन ।

० जीवनमा कुनै गीतले प्रभाव पारेको छ ?

- गीत त्यति याद हुँदैन तर भुमिगत छँदा गाइ त बाँध्यो ढुंग्रोमा….. गरीबको चमेली बोल्दिने कोही छैन, अनि गाँउ गाँउबाट उठ बस्ती बस्तीमा उठ खुव सुनिन्थ्यो अनि गाइन्थ्यो ।

० मन पर्ने कलाकार ?

- नेपाली अरुणा लामा, तारादेवी, नारायणगोपाल, रामेश, मञ्जुल राम्रा लाग्छन् । हिन्दीमा मोहम्मद रफी र लता मंगेश्वरका गीत सुन्छु । रफीको निधन हुँदा मलाई गहिरो चोट परेको थियो ।