२६ साउन, काठमाडौं । मिस नेपाल सुबिन लिम्बु वन्यजन्तु संरक्षणका लागि युवा सद्भावना राजदूत बनेकी छन् । विश्व वन्यजन्तु कोषको नवौं संरक्षण राजदूतका रुपमा उनले सोमवार ओहोदाको प्रमाणपत्र बुझेकी छन् ।
वन्यजन्तु कोष नेपालका कार्यक्रम निर्देशक डा. घनश्याम गुरुङले नेपाल सुन्दरी लिम्बुलाई संरक्षण राजदूतको ओहोदाको प्रमाणपत्र दिएका थिए । कोषले नेपाल सुन्दरीलाई संरक्षणको क्षेत्रमा लगाउने र उनीहरुमार्फत युवा पुस्तालाई वन्यजन्तु संरक्षणप्रति सचेत गराउने नीति लिएको गुरुङले बताए ।
सो अवसरमा यसअघिकी मिस नेपाल इशानी श्रेष्ठले आफ्नै पहलमा निःशुल्क दन्त शिविर गरे बापत उनलाई सम्मानित गरिएको थियो । इशानाले सोही कार्यक्रममा आफ्नोतर्फबाट चार सय अमेरिकी डलर अर्थात करीव ४० हजार रुपैया चितवनको माडी हेल्थपोष्टलाई सहयोगको घोषणा गरेकी थिइन् ।
विश्व वन्यजन्तु कोष नेपालले सन् २००४ देखि मिस नेपाललाई संरक्षण राजदूतका रुपमा नियुक्त गरेर वन्यजन्तु संरक्षणको जनचेतनामा सघाउदै आएको कोषका निर्देशक डा. घनश्याम गुरुङले बताए ।