२६ भदौ, काठमाडौं । नेपाली कांग्रेसको भातृ संगठन नेपाल विद्यार्थी संघको सातौ पटक स्थगित भएको ११ औं महाधिवेशन भदौ २९ देखि शुरु हुने भएपछि नेतृत्वमा पुग्न विद्यार्थी नेताहरुले लबिङ तीब्र बनाएका छन् ।
काठमाडौंमा हुने नेविसंघको महाधिवेशन ८ वर्षपछि पहिलो पटक आयोजना भएकाले अध्यक्षका आकांक्षीहरु करिब एक दर्जन देखिएका छन् ।
नेपाली कांग्रेस र नेपाली कांग्रेस प्रजातान्त्रिकबीच पार्टी एकीकरण भएपछि नेविसंघको महाधवेशन हुन सकेको छैन ।
अध्यक्षका दावेदारहरु अधिकांश उमेरले ४० काटिसकेका छन् । विद्यार्थी नेता हुनलाई उमेर हद नतोकिएका कारण बुढा नेताहरु पनि विद्यार्थीको अध्यक्ष बन्न कस्सिएका हुन् ।
अध्यक्षमा को को ?
पार्टीमा सुशील कोइराला र शेरवहादुर देउवा पक्षबीच प्रतिस्पर्धा भए जस्तै नेविसंघमा पनि आ-आफ्नो बर्चश्व कायम गर्न दुवै गुटबीच प्रतिस्पर्धा छ ।
अध्यक्षमा कोइराला पक्ष र देउवा पक्षका विद्यार्थी नेताहरुबीच आफ्नै गुटमा समेत प्रतिस्पर्धा देखिएको छ ।
कोइराला पक्षबाट अध्यक्षको बलियो दावेवार पूर्व महामन्त्री मनोजमणी आचार्य देखिएका छन् । त्यस्तै क्षितिज भण्डारी, भीम श्रीष, कुन्दन काफ्ले, पदमराज पन्त र दिपक भट्टराईले कोइराला पक्षबाटै अध्यक्षमा दावी गरेका छन् ।
देउवा पक्षबाट पूर्व उपाध्यक्ष रत्न कार्कीलाई अध्यक्षको उम्मेदवार बनाउन नेताहरुले सहमतिको प्रयास थालेका छन् । देउवा पक्षकै नैनसिंह महर, जितजङ बस्नेतले पनि अध्यक्षमा दावी गरेका छन् ।
शिकारी पनि उम्मेदवार
केही महिनाअघिमात्र धादिङको एक सामुदायिक वनभित्र पसेर मृग मारेको अभियोगमा पक्राउ परी तारेखमा छुटेका शुभराम बस्नेतले पनि नेविसंघको अध्यक्षमा उम्मदेवारी दिने घोषणा गरेका छन् ।
शंकरदेव क्याम्पसका स्ववियु सभापति समेत रहेका बस्नेतले पुतलीसडकमा सवारी आवागमन नै रोकेर आफ्नो उम्मेदवारी घोषणा गरेको विद्यार्थीहरुले बताएका छन् ।
उनी केही महिनाअघि कलंकीबाट अवैध हतियारसहित पक्राउ परेर राजनीतिक दबाबमा छुटेका थिए । उनी पनि देउवा पक्षबाटै अध्यक्षको उम्मेदवारका दावेदार हुन् । बस्नेतले अध्यक्षमा अाफूले जित्ने दाबीसमेत गरेका छन् ।
देउवा पक्षभित्रै खुमवहादुर खड्काले अलग्गै उम्मेदवार बोकेका छन् । खड्का पक्षधर गणेश बिष्टले पनि अध्यक्षमा दावी गरेका छन् ।
महामन्त्रीमा महिला पनि
महामन्त्रीमा कोइराला पक्षबाट उर्मिला थपलियाले धेरै अघिनै उम्मेदवारी घोषणा गरेर देशव्यापी अभियान चलाइसकेकी छन् ।
महामन्त्रीमा संस्थापन पक्षबाट मनोजन कोइराला, रामप्रसाद अधिकारी, मोतिलाल भण्डारी, युवराज पाण्डे, नीलकण्ठ रिजाल लगायतले उम्मेदवारी घोषणा गरेका छन् ।
देउवा पक्षबाट महामन्त्रीमा सरोज थापा, राजिव ढुंगाना, दीपक सोनी लगायतको नाम चर्चामा छ । अध्यक्षको उम्मेदवारमध्येबाटै महामन्त्रीमा व्यवस्थापन गर्दा यी उम्मेदवारले अरु जिम्मा पाउने सम्भावना छ ।
पार्टी नेता खटिए
संस्थापन पक्षले उम्मेदवारहरुलाई मिलाउने जिम्मा महामन्त्री कृष्णप्रसाद सिटौला, दिलेन्द्र बडुसहित नेविसंघका पूर्वअध्यक्ष तथा महामन्त्रीहरुलाई दिएको छ ।
देउवा पक्षले प्रकाशशरण महत सहित पूर्व अध्यक्षहरुलाई उम्मेदवारहरुबीच सहमति गराउन जिम्मेवारी दिएको अध्यक्षका दावेदार रत्न कार्कीले बताए ।
भदौ २९ गते महाधिवेशन हुने भनिए पनि अहिलेसम्म चितवन, स्याङ्जा, रौतहट, बारा, मकवानपूर, धनुषा लगायतका जिल्लामा विवादका कारण अधिवेशन हुन सकेको छैन ।
त्यस्तै केन्द्रीय क्याम्पस किर्तिपुर, त्रिचन्द्र, बाल्मिकी, अमृत साइन्स, पद्मकन्या, नेपाल कमर्स क्याम्पस मिनभवन लगायतका क्याम्पसको पनि अधिवेशन भएको छैन ।
अधिवेशन कुनै पनि हालतमा स्थगित नहुने र स्थगित भएमा मान्य नहुने अध्यक्षका अर्का उम्मेदवार मनोजनमणि आचार्यले बताए ।
नेविसंघ महाधिवेशनले अध्यक्ष, पाँच उपाध्यक्ष, दुई महामन्त्री, पाँच सहमहामन्त्री, एक कोषाध्यक्ष सहित १ सय १ सदस्यीय केन्द्रीय कार्य समिति चयन गर्नेछ ।
