२६ भदौ, विराटनगर । पाँचथरको सिमानामा रहेको काबेली हाइड्रोपावरका ठेकेदार र कर्मचारीहरुलाई बन्धक बनाएको आरोपमा भूमिगत समूह लिम्बुवान क्रान्तिकारी पार्टीका ताप्लेजुङ अध्यक्ष मनिष हेल्लोक सहित तीनजनालाई प्रहरीले पक्राउ गरेको छ ।
पक्राउ पर्नेमा ताप्लेजुङ तापेथोक ८ का २८ वर्षीय मनिष हेल्लोक, ७ का २४ वर्षका दर्शन लिम्बु, छुरुम्बु १ का टाइगर टेन भनेर चिनिने सावाहाङ लिम्बु रहेका छन् ।
उनीहरुलाई जिल्ला प्रहरी कार्यालय पाँचथरका प्रहरी निरीक्षक मेघराज थापाको कमाण्डमा खटिएको ताप्लेजुङ प्रहरीको सहयोगमा ताप्लेजुङ बजारस्थित बीरेन्द्र चौकबाट पक्राउ गरेको हो ।
ताप्लेजुङ १ मा समेत घर भएका मनिष हेल्लोकको घरबाट प्रहरीले १ थान पेस्तोल, २ थान म्यागाजिन, एक राउण्ड गोली, १ थान ल्यापटप, ३ थान मोवाइल र पार्टीको लेटर प्याड समेत बरामद गरेको छ ।
उनीहरुले ठेकेदारहरुलाई बन्धक बनाएर तीन करोड रुपैयाँ फिरौती मागेको थाहा पाएपछि प्रहरी टोली गएको थियो ।
