२५ असोज, काठमाण्डौ । प्रधानमन्त्री सुशील कोइरालाले मुलुक शान्ति र स्थायित्वको बाटो अगाडी बढिरहेकाले नेपालमा लगानी भित्राउन बिदेशी लगानीकर्ता र गैरआवासीय नेपालीहरुलाई आह्वान गरेका छन् ।
गैरआवासीय नेपाली संघका अध्यक्ष शेष घलेको लगानीमा काठमाण्डौ स्थापना हुन लागेको पाँचतारे लक्जरी होटल ‘शेराटन काठमाण्डौ होटल’को शिलन्यास गर्दै प्रधानमन्त्री कोइरालाले भने- ‘नेपाल लगानीका लागि भर्जिन ल्याण्ड हो, यहाँ लगानी गर्नुहोस, शान्ति सुरक्षाको ग्यारेन्टी हामी गछौं ।’
बिदेशमा आर्जन गरेको सीप र पूँजी नेपाल भित्राउन र प्रत्यक्ष बैदेशिक लगानीको वातावरणका लागि पनि भूमिका खेलिदिन उनले गैरआवासीय नेपालीहरुलाई आग्रह गरे ।
एनआरएन अध्यक्ष घलेले हिम्मत र शाहसका साथ ठूलो लगानी गर्न लागेको भन्दै प्रधानमन्त्रीले यसले बिश्व समुदायमाझ नेपाल लगानीमैत्री मुलुक हो भन्ने सन्देश जाने बिश्वास लिए ।
नेपालका लागि अष्ट्रेलियाली राजदूत ग्लेन ह्वाइटले शेराटनमा घलेले गरेको लगानी नेपालका लागि अष्ट्रेलियाको सवैभन्दा ठूलो लगानी भएको बताउँदै यसले अष्ट्रेलियाको पनि प्रतिष्ठा बढाएको बताए ।
शेराटन होटलका एसिया प्यासिफक क्षेत्रीय उपाध्यक्ष दिलीप पुरीले एमआर्यटी ग्रुपसँग मिलेर शेराटन करिव ३० बर्षपछि पुनः नेपाल आएको बताउँदै यसले नेपालको पर्यटन उद्योगलाई टेवा पुर्याउने बिश्वास लिएको बताए ।
प्रधानमन्त्री कोइरालाले सो अबसरमा बिधिवध पुजा गरी होटलको शिलन्यास गरेका थिए ।
होटलका प्रर्बद्धक एमआईटी ग्रुप होल्डिङ्सका प्रमुख कार्यकारी अधिकृत शेष घलेले नेपालमा लगानीमैत्री वातावरण नबनेको भएपनि एक गैरआवासीय नेपाली नागरिकका नाताले मातृभूमिप्रतिको दायित्व सम्झेर ठूलो लगानी भित्राएको बताए । यसले नेपालको पर्यटन उद्योगमा सकारात्मक प्रभाव पार्ने भन्दै उनले लगानीमैत्री नीति र ब्यबहार दुवै अंगीकार गर्न सके यस्ता ठूला बिदेशी लगानी आर्कषिर्त हुनसक्ने बताए ।
‘नेपालमा लगानी गर्न विदेशी लगानीकर्ता आतुर छन्, लगानीको वातावरण भएमा सबैभन्दा बढी पर्यटन क्षेत्रमा लगानी भित्रिनेछ’ घलेले भने- ‘अनि पर्यटन क्षेत्र मुलुकको अर्थतन्त्रको मेरुदण्ड बन्ने छ ।’
यस्तो हुनेछ होटल
एमआईटी ग्रुप होल्डिङस अष्ट्रेलियाको एकल लगानीमा स्थापना हुन लागेको होटलको संचालन र ब्यबस्थापन बिश्वचर्चित शेराटन ब्राण्डको प्रर्बद्धक स्टारवुड ग्रुपले गर्ने छ । होटलमा सतप्रतिशत बैदेशिक लागनी रहने छ ।
करिव १४ रोपनी क्षेत्रफलमा निर्माण हुने होटल १७ तलाको हुने छ । होटलमा दुई तला पार्किङ, बेसमेन्ट, लवीसहित १३ वटा तलामा गेष्टरुम रहनेछन् ।
होटलको डिजाइन र नक्सा पास भइसकेको जानकारी दिादै घलेले अबको २/३ महिनाभित्रमा निर्माण कार्य सुरु हुन बताए । सन् २०१७ को अन्त्यसम्ममा होटलको निर्माण कार्य सम्पन्न गरी सन् २०१८ फेब्रुअरी महिनाबाट सञ्चालन गर्ने लक्ष्य राखिएको छ ।
पाँचतारे लक्जरी होटल शेराटन काठमाडौंमा २१८ वटा गेष्टरुम तथा सुइट रुम रहने छन् । हेल्थ क्लव, स्पा, वातानुकुलित स्वीमिङ पुल र फिटनेस सेन्टरसहितका सुविधा यस होटलमा उपलब्ध हुनेछन् । होटलभित्रै रिटेल सपिङ सुबिधा हुने छ भने स्थानीय र अन्तर्राष्ट्रिय स्वादका खानाको आनन्द लिन सकिने छ ।
विवाह तथा सभा समारोहका लागि करिव एक हजार सिट क्षमताको सभाकक्ष रहने छ । जुन सभाकक्ष काठमाडौंमा हालसम्म उपलब्धमध्ये सबैभन्दा ठूलो हुने दाबी गरिएको छ । यसबाहेक थप दुईवटा सभाकक्ष, तीनवटा मिटिङ रुम र बोर्ड रुम पनि रहनेछन् ।
भवनको निर्माण आधुनिक ‘पोष्ट टेन्सन्ड कंक्रिट’ बिधिमार्फत् गरिने छ, जुन काठमाडौंमा पहिलोपटक प्रयोग गर्न लागिएको हो । यसले भवनलाई बलियो र सुरक्षित बनाउने छ । होटल निर्माणका क्रममा करिव ५० हजारले प्रत्यक्ष रोजगारी पाउने छन् भने होटल संचालनपछि ४५० जना दक्ष जनशक्तिले रोजगारी पाउने छन् ।
बिश्वकै अग्रणी होटल म्यानेजमेन्ट कम्पनी ‘स्टारवुड होटल एण्ड रिसोर्ट वल्डवाइड इंक’ले संचालन गर्ने विभिन्न होटल ब्राण्डमध्ये शेराटन पनि एक हो । शेराटन ब्राण्डमा बिश्वका करिव ७० मुलुकमा ४ सय होटल संचालन भइरहेका छन् । स्टारवुडले शेराटनबाहेक St. Regis®, The Luxury Collection®, W®, Westin®, Le Méridien®, Sheraton®, Four Points® by Sheraton, Aloft®, and Element® ब्राण्डमा बिश्वका झण्डै एक सय मुलुकमा होटल सञ्चालन गरिरहेको छ जहाँ करिव १ लाख ८१ हजार ४ सय कर्मचारी कार्यरत छन् ।
गैरआवासीय नेपाली शेष घले र जमुना गुरुङद्वारा प्रर्बद्धित अष्ट्रेलियाको मेलवर्नमा मुख्यालय रहेको ‘एमआईटी ग्रुप होल्डिङ्स’ले शिक्षा र रियलस्टेट क्षेत्रमा काम गरिरहेको छ । एमआईटीको लगानीमा मेलवर्न र सिड्नीमा ‘मेलवर्न इन्टिच्यूट अफ टेक्नोलोजी’ कलेज संचालन गरिरहेको छ जहाँ करिव ३ हजारभन्दा धेरै अन्तर्राष्ट्रिय विद्यार्थी अध्ययनरत छन् ।
एमआईटी ग्रुपले पोपर्टी म्यानेजमेन्टको काम पनि गरिरहेको छ । एमआईटीसँग मेलवर्न र सिड्नीका मुख्य स्थानमा रहेका बिभिन्न व्यवसायिक भवनहरुको स्वामित्व छ ।