२७ असोज, काठमाडौं । नेकपा एमालेका सचिव प्रदिप ज्ञावलीले आन्दोलन तत्काल फिर्ता नलिए एमाले प्रचण्ड संयोजक रहेको उच्चस्तरीय राजनीतिक समितिमा नबस्ने चेतावनी दिएका छन् ।
उनले पहिचान पक्षधरहरुको आन्दोलन संविधान भाँड्ने षडयन्त्र भएको दावी गरे । पहिलो संविधानसभामा प्रचण्डले दोहोरो भूमिका खेलेर संविधान आउन नदिएको र अहिले पनि त्यस्तै भूमिकामा प्रस्तुत भएको उनको आरोप छ ।
रिपोर्टर्स क्लब नेपालले सोमबार गरेको साक्षात्कारमा एमाले सचिव ज्ञवालीले भने-‘प्रचण्ड आफैं राजनीतिक समितिको संयोजक हुने, अनि आन्दोलन पनि गर्ने यो नैतिकताले दिँदैन । आन्दोलन गरिरहने हो भने संयन्त्रको औचित्य सकिन्छ ।’
शासकीय स्वरुपमा तीन वर्षसम्म अविश्वासको प्रस्ताव ल्याउन नपाउने गरी कांग्रेसको प्रस्तावमा सहमति नजिक रहेको स्पष्ट पार्दै उनले सात वटा प्रदेश भने एमालेको बटमलाइन भएको बताए ।
कांग्रेसका प्रवक्ता दिलेन्द्र बडुले कांग्रेसले संघीयता र शासकीय स्वरुपमा प्रस्तुत गरेको धारणा बटमलाइन नभई विकल्प भएको स्पष्ट पारे । जातीय द्वन्द्व मेटिने र सबैको पहिचान स्थापित हुने गरी कांग्रेसले अवधारणा प्रस्तुत गरेको भन्दै उनले एकल जातीय पहिचान स्वीकार्य नभएको बताए ।
कार्यक्रममा एमाओवादी संसदीय दलका उपनेता टोपबहादुर रायमाझीले कांग्रेस र एमाले पहिलो संविधानसभाको उपलब्धि र विगतका सम्झौता विपरित अघि बढे माघ ८ मा संविधान आउन नसक्ने चेतावनी दिए ।
रायमाझीले १० प्रदेश आफूहरुको बटमलाइन भएको भन्दै उनले प्रत्यक्ष निर्वाचित कार्यकारिणी, समानुपातिक निर्वाचन प्रणाली कुनै पनि हालतमा नछाड्ने समेत बताएका छन् ।
एमाओवादीकै अर्का नेता खिमलाल देबकोटाले कांग्रेसको प्रस्ताव विगतका सहमति विपरित भएको बताए । कांग्रेसको प्रस्ताव विकल्प नभएर बटमलाइन भए माघ ८ मा संविधान नबन्ने उनले ठोकुवा गरे ।
नेपाल परिवार दलका अध्यक्ष एकनाथ ढकालले साना पार्टीहरुको मोर्चा रारा मञ्च कांग्रेस एमालेको संघीयता र शासकीय स्वरुपको प्रस्तावको नजिक रहेको तर निर्वाचन प्रणालीमा पूर्ण समानुपाति हुनु पर्ने बताए ।
