१५ मंसिर, काठमाडौं । इराकी सेनामा भएको एक छानविनले यस्ता ५० हजार सैनिक पत्ता लगाएको छ, जसको कुनै अत्तोपत्तो छैन । तर, उनीहरुको नाममा तलब जाने गरेको छ ।
यस्तो सैनिकहरुलाई ‘भूत सैनिक’ नाम दिइएको छ ।
अब इराकको प्रधानमन्त्री कार्यालयले यस्ता सैनिकहरुको तलब भत्ता रोक्का गरेको छ ।
इराकी सेनामा भ्रष्टाचार ठूलो समस्या हो, जसका कारण इस्लामिक स्टेट आईएसविरुद्ध लड्ने क्षमता समेत कमजोर भएको छ ।
समाचार एजेन्सी एपीका अनुसार इराकी प्रधानमन्त्री हैदर अल अबादीका प्रवक्ता रफिल जबूरीले भनेका छन्-‘पछिल्लो केही साता प्रधानमन्त्रीले भूत सैनिकको विषय पत्ता लगाउन कदम उठाएका थिए ।’
कुनै अत्तोपत्तो नभएका सैनिकको तलब सेनाका उच्च अधिकारीहरुले लिएको अनुमान गरिएको छ । ती ५० हजार सैनिकमध्ये केही युद्धमा मारिएका थिए भने केहीले सेनाको जागिर नै छाडेका छन् ।
इराकमा सेना बनाउन अमेरिकाले अर्बौं डलर खर्च गरेको छ । तर, पछिल्लो केही समय यता चरमपन्थी संगठन इस्लामिक स्टेटविरुद्ध इराकी सेना लाचार जस्तै देखिएको छ ।