२३ मंसिर, काठमाडौं । भारतीय प्रधानमन्त्री नरेन्द्र मोदी टाइम पर्सन अफ दि इयरको दौडबाट बाहिरिएका छन् ।
यद्यपि उनी अनलाइन मतदानमा सबैभन्दा अगाडि थिए । अनलाइन मतदानमा मोदी १६ प्रतिशत मतका साथ सबैभन्दा अगाडि थिए ।
तर, टाइमले पर्सन अफ दि इयरका लागि घोषणा गरेको अन्तिम आठ हस्तीमा उनी परेनन् ।
को-को परे अन्तिम आठमा
टाइमको पर्सन अफ दि इयरको अन्तिम आठमा फर्गुसनका प्रदर्शनकारी परेका छन् । अमेरिकामा काला व्यक्तिको हत्यामा संलग्न गोरा प्रहरी अधिकारीलाई कारबाही नगरेपछि फर्गुसनमा प्रदर्शन चर्किएको छ ।
इबोलाको उपचार गराइरहेका डाक्टर तथा नर्स, रुसी राष्ट्रपति भ्लादिमिर पुटिन, एप्पलका सीइओ टिम कुक र कुर्द नेता मसूर बरजानी पनि छन् ।
गायिका टेलर स्विफ्ट, अलीबाबा समूहका प्रमुख ज्याक मा र राष्ट्रिय फुटबल लिग आयुक्त रोजर गुडेल पनि अन्तिम आठमा परेका छन् ।
