१६ जेठ, सप्तरी । गणतन्त्र दिवसको अवसरमा सप्तरीको राजविराज कारागारमा जेल जीवन बिताइरहेका दश कैदीबन्दीलाई आम माफी दिएको छ ।
देशका विभिन्न कारागारमा रहेका कैदीको सजाय मिनाहा गर्ने क्रममा यस वर्ष सप्तरीबाट एक महिलासहित १० जनाको कैदी बन्दीलाई माफी गरी मिनाहा गरिएको कारागार प्रशासनले जनाएको छ ।
राजविराजको कारागारमा करिब २ सय ५६ कैदीमध्ये ५० प्रतिशत कैद भुक्तान गरेका र असल चालचलन ठीक भएका १० जना कैदीको कैद मिनाहा गरिएको सप्तरी कारागारका जेलर कृष्णप्रसाद दाहालले जानकारी दिनुभयो ।
कैद मिनाहा हुने कैदीमा छोटियादेवी मरिक, सुरज मरिक, चुल्हाय मण्डल नाजिम मियाँ, उमेश यादव, सचिन भनिने कामेश्वर साह, नागेन्द्रप्रसाद रिजाल, विष्णु यादव, वेरसु यादवलगायत रहेका छन् ।
राजविराज कारागारमा १२५ जना कैदीबन्दी बस्ने क्षमता रहेको कारागारमा हाल १३ महिलासहित २५७ जना कैदी रहेका छन् । । रासस