४ असार, काठमाडौं । भारतको मुम्बईमा भारी वर्षातको कारण जनजीबन प्रभावित भएको छ । वर्षाको आनन्द लिन भन्दै मदिरा पिउँदा मुम्बइका २७ युवकको मृत्यु भएको छ ।
मुम्बई जलमग्न भएपछि रेल सेवा र विद्यालय बन्द गरिएको छ । मुम्बई विश्वविद्यालयमा आजको परीक्षा स्थगित भएको छ ।
गाडी गुड्ने सडकहरु जलमग्न भएपछि यातायात सेवा पनि प्रभावित भएको छ । ठाउँ ठाउँमा रुखहरु ढलेर बाटो बन्द भएका छन् ।
स्थानीय प्रशासनले एकदमै जरुरी काम परेकोबेला बाहेक घरबाट बाहिर ननिस्किन सर्बसाधारणलाई आग्रह गरेको छ ।
गत २४ घण्टादेखि मुम्बईमा लगातार पानी परिरहेको छ । स्थानीय मौसम विज्ञान विभागले पानी पर्ने क्रम अझै २-४ दिनसम्म जारी रहने बताएको भारतीय सन्चार माध्यमहरुले जनाएका छन् ।
वर्षातको आनन्द लिँदा मृत्युको मुखमा
यसैबीच वर्षातको समयमा आनन्द लिने भन्दै घरेलु मदिरा सेवन गर्दा मुम्बईमा मृत्यु हुनेको संख्या २७ पुगेको छ । अरु ३३ जना गम्भीर विरामी परेका छन् ।
विरामी परेकाहरुको बिभिन्न अस्पतालमा आईसीयूमा राखेर उपचार भैरहेको छ । दिरा सेवन गरेर मृत्यु भएका र विरामी परेकाहरु २५ देखि ३० बर्ष उमेर समुहका छन् ।
प्रहरीले मदिरा बिक्रेतालाई पक्राउ गरेर अनुसन्धान सुरु गरिएको जनाएको छ ।