२८ असार, काठमाडौं । नेपाली सडकमा हुइँकिने सवारीको संख्या सवा १९ लाख नाघेको छ । जसमा सबैभन्दा बढी बाइक तथा स्कुटर रहेका छन भने दोस्रोमा साना गाडी कार, जीप र भ्यान रहेका छन् ।
आर्थिक वर्ष २०७०/७१ मा १७ लाख ५५ हजार ८२१ सवारी यातायात विभागमा दर्ता भएका थिए । चालु आर्थिक वर्षको ८ महिनामा एक लाख ६९ हजार ६१३ सवारी थपिएपछि फागुन मसान्तसम्म कुल सवारी संख्या सवा १९ लाख पुगेको हो ।
चालु आवको प्रथम आठ महिनामा थपिएका सवारीको संख्या अघिल्लो वर्षको सोही अवधिको तुलनामा ३०.४७ प्रतिशत बढी हो । यसले नेपालमा सवारीको संख्या तिब्र गतिमा बढिरहेको देखाउँछ ।
कुल सवारीमध्ये १५ लाख १३ हजार ४४७ थान बाइक तथा स्कुटर रहेका छन् । त्यस्तै, साना गाडी कार, जीप र भ्यानको संख्या १ लाख ५९ हजार पुगेको छ । ट्रयाक्टर तथा पावर टेलरको संख्या पनि लाख नाघेको छ ।
सवारीको किसिम | संख्या |
---|---|
बस | ३५२८९ |
मिनिबस/मिनिट्रक | १६००७ |
क्रेन/डोजर/एक्साभेटर/ट्रक | ५४४४८ |
कार/जीप/भ्यान | १५९१६१ |
पिकअप | २७५४२ |
माइक्रो बस | ३४२५ |
टेम्पो | ८४४१ |
बाइक/स्कुटर | १५१३४४७ |
टेक्टर/पावर टेलर | १०००८२ |
अन्य | ६५९२ |
जम्मा | १९,२५,४३४ |
स्मार्ट कार्ड छपाई सुरु
सरकारले सवारी दर्ता प्रमाणपत्र र सवारी चालक अनुमति पत्रलाई इलेक्ट्रोनिक स्मार्ट कार्डमा परिवर्तन गर्न डाटा माइग्रेसनको काम सुरु गरेको आइतबार सार्वजनिक गरिएको आर्थिक सर्वेक्षणमा उल्लेख छ । यसका लागि १ लाख ६० हजार स्मार्ट कार्ड छाप्ने काम समेत सुरु भइरहेको छ ।
सवारी साधनको नम्बर प्लेटलाई इम्बोस्ड नम्बर प्लेटमा परिणत गर्न प्लेटको डिजाइन, उपयुक्त प्रविधिको सिफारिस, लागत र प्रकृयाका साथै प्रचलित कानूनमा गर्नुपर्ने संशोधन सम्बन्धी काम भइरहेको बताइएको छ ।
आलु आवको फागुन मसान्तसम्म ३६ हजार २३८ सवारी चालक अनुमतिपत्र वितरण भएको छ । यसरी अहिलेसम्म २१ लाख ७३ हजार ३७९ सवारी चालक अनुमतिपत्र वितरण भइसकेको सर्भेक्षणमा उल्लेख छ ।