५ असार, काठमाडौं । संयुक्त राज्य अमेरिकाका ३२२ उद्योगले मुलुकको विभिन्न क्षेत्रमा सात अर्ब ३३ करोड ३० लाख रूपैयाँ लगानी गर्न स्वीकृति प्राप्त गरेका छन् ।
अमेरिकाका सबैभन्दा बढी १४८ उद्योगको लगानी नेपालको सेवा क्षेत्रमा रहेको उद्योग विभागले जनाएको छ । विभागको तथ्यांकअनुसार अमेरिकी उद्योगको आकर्षण सफ्टवयर क्षेत्रमा देखिन्छ । लगानी गर्न स्वीकृति प्राप्त गरेका अमेरिकी उद्योगमध्ये सेवा क्षेत्रमा १४८ उद्योगको दुई अर्ब ६९ करोड ७० लाख रूपैयाँ, उत्पादनमूलक क्षेत्रमा ७० उद्योगको दुई अर्ब १० करोड ३० लाख रूपैयाँ, पर्यटन क्षेत्रमा ८० उद्योगको एक अर्ब दुई करोड १० लाख रूपैयाँ लगानी रहेको छ ।
यसैगरी, ऊर्जा क्षेत्रमा तीन उद्योगको एक अर्ब २८ करोड ७० लाख रूपैयाँ, कृषि तथा वनजन्य क्षेत्रमा २० उद्योगको २१ करोड २० लाख रूपैयाँ र निर्माण क्षेत्रमा एक उद्योगको एक करोड रूपैयाँ लगानी छ । विसं २०७३ जेठ मसान्तसम्म स्वीकृत पाएका अमेरिकी उद्योगको उक्त लगानीबाट मुलुकका विभिन्न क्षेत्रमा १६ हजार २९३ रोजगारी सिर्जना हुने विभागले जनाएको छ ।
विदेशी उद्योग दर्ता प्रक्रियाको सहजताका लागि विभागले अनलाइन सेवा सुरु गर्ने तयारी गरेको र छिट्टै सञ्चालनमा आउने विभागका महानिर्देशक महेश्वर न्यौपानेले बताए । विदेशी उद्योग दर्ता प्रक्रियाको सहजतासँगै मुलुकमा विदेशी लगानी बढ्ने क्रम जारी छ ।
नेपालमा २०४६ सालदेखि हालसम्म विश्वका ८७ देशका जम्मा तीन हजार ५७८ बढी उद्योगले लगानीका लागि स्वीकृति प्राप्त गरेका छन् । त्यसमध्ये सबैभन्दा बढी लगानी भारतीय उद्योगको रहेको छ । भारतपछि दोस्रोमा चीन र तेस्रोमा अमेरिकाका उद्योगले नेपालमा लगानी गरेका बताइएको छ । रासस
