६ असार, चितवन । चितवन राष्ट्रिय निकुञ्जमा चालु आवको ११ महिनामा ८२ हजार पर्यटक आएका छन् । उनीहरुबाट झन्डै १२ करोड रूपैयाँ राजस्व संकलन भएको निकुञ्जले आज जनाएको छ ।
सबैभन्दा बढी प्रवेश शुल्कबाट राजस्व सङ्कलन भएको निकुञ्जका रेन्जर ऋषिराम ढकालले जानकारी दिए ।
उनका अनुसार गएको साउन महिनादेखि जेठसम्म निकुञ्जमा ८१ हजार ८१३ जना पर्यटक प्रवेश गरेका छन् । पर्यटकबाट ११ करोड ९३ लाख ६७ हजार २७३ रूपैयाँ राजस्व संकलन भएको छ ।
निकुञ्ज घुम्नेमा ४२ हजार १५१ जना पुरुष र ३९ हजार ६६२ जना महिला पर्यटक रहेका छन् । सबैभन्दा बढी सौराहा क्षेत्रबाट पर्यटक निकुञ्ज प्रवेश गरेको पाइएको ढकालले जानकारी दिए । ८ करोडभन्दा बढी राजस्व प्रवेश शुल्कबाट मात्रै उठेको छ ।
चैत महिनामा सबैभन्दा बढी एक करोड ८६ लाख ४४ हजार रूपैयाँ बढी राजस्व सङ्कलन भएको छ ।
अघिल्लो वर्ष भूकम्पपछिको समयमा निकुञ्जमा पर्यटक शून्य जस्तै भए पनि यो आवमा भने बढेको पाइएको निकुञ्जले जनाएको छ । रासस
