विश्वकै कान्छा निर्देशक सौगात बिष्टले निर्देशन गरेको दोश्रो चलचित्र ‘हैरान’को छायांकन ६१ दिन लगाएर सकिएको छ । छायांकनका लागि तयार पारिएको सेड्यूल भन्दा बढी समय लागेको कलाकार गजित बिष्टले जानकारी दिए ।
निर्माणपक्षले यो चलचित्रको छायांकन ४५ दिनमा सक्ने योजना बनाएको थियो । तर, निर्धारित समय भन्दा बढी समय लागेपछि बजेट पनि बढेको छ । मुक्ति घले र वाइ.एल लामा, श्रृष्टी घिमिरेको निर्माणमा तयार भएको यो चलचित्रमा गजित बिष्ट, निश्मा घिमिरे, सत्यराज आचार्य, पुष्कर रेग्मी, नव-कलाकार आरोहि शर्मा लगायतको मुख्य भूमिका छ ।
चलचित्रको बिषयवस्तु नै गरुङ्गो भएकाले छायांकन मिति लम्बिएको निर्माणपक्षले जानकारी दिएको छ । चलचित्रलाई कमेडी, प्रेम र सस्पेन्स शैलीमा निर्माण गरिएको छ । पहिलो चलचित्र ‘लभ यू बाबा’ निर्देशन गरेर सौगातले विश्वकै कान्छा निर्देशकको रेकर्ड बनाएका थिए ।
यो चलचित्र भने कमर्सियल रुपमा तयार पारिएको र दर्शकले मन पराउने कलाकार गजित बिष्टले बताए । चलचित्रको कथा गम्भिर बिष्टले लेखेका हुन् ।
