काठमाडौं । नेपाल प्रज्ञा-प्रतिष्ठानका कुलपति गङ्गाप्रसाद उप्रेतीको ‘चक्रव्यूह’ कवितासङ्ग्रह बजारमा आएको छ ।
यसअघि निबन्ध, संस्मरण, समालोचना र भाषा-संस्कृति सम्बन्धी ११ वटा पुस्तक निकालिसकेका उप्रेतीको यो बाह्रौं कृति हो । सङ्ग्रहभित्र ०२० सालदेखि पछिल्लो समयसम्म रचिएका २७ वटा कविता समेटिएका छन् ।
तेह्रथुमको आठराईमा स्कूले बेलामै ०१६ सालतिर कविता लेखन सुरु गरेका उप्रेतीका कविता बीसको दशकमै ‘रूपरेखा’, ‘दियालो’, ‘मधुपर्क’, ‘सङ्कल्प’ आदिमा प्रकाशित भएका पाइन्छन् । उतिबेला उनका कविता नेपालभित्र मात्र नभई मेची पारि समेत लोकप्रिय थिए ।
तर, बीसको तीसको दशकको सुरुवातमा राजनीतिक कारणले निर्वासित भएपछि उप्रेतीको कविता लेखन पातलिएको थियो ।
सङ्ग्रह अक्सफोर्ड इन्टरनेसनल पब्लिकेसनले प्रकाशन गरेको हो ।