२७ फागुन, काठमाडौं । संघीय गठवन्धन र मधेसी मोर्चा आवद्ध सांसदहरुले व्यवस्थापिका संसदको बैठकमा सप्तरी घटनाका दोषीलाई कारवाहीको माग गर्दै नाराबाजी गरेका छन् ।
संघीय समाजवादी फोरमका नेता अशोक कुरा राईले बोलिसकेपछि उनीहरुले आ -आफ्नो ठाउँबाट रोष्टम अगाडि आएर सप्तरी घटनाका दोषीमाथि कारवाही माग्दै नाराबाजी गरेका हुन् ।
राईले सप्तरी घटनामा सरकारका तर्फबाट अनावश्यक बल प्रयोग भएको भन्दै दोषीमाथि कारवाहीको माग गरे ।
राईले कन्चनपुरमा एसएसबीको गोली लागेर एक जनाको मृत्यु भएको भनिए पनि भारतीय दूतावासले गोली नचलेको दाबी गरेकाले घटना रहस्यमय भएको बताए । राईले यसबारे सत्यतथ्य सदनलाई जानकारी गराउन माग गरे ।
नाराबाजी चलिरहेका बेला सत्तारुढ नेपाली कांग्रेसका सांसद रामकृष्ण यादवले नाराबाजीकै बीच संसद चलाइएको भन्दै नियापत्ति गरे । उनले एमालेले बिरोध गर्दा संसद अवरुद्ध भएको भन्दै गर्दा सभामुख ओनसरी घर्तीले उनलाई रोकेर एमाले सांसद प्रेमबहादुर आलेलाई शून्य समयमा बोल्न दिइन् ।
आलेले कञ्चनपुरमा भारतीय सुरक्षाकर्मीको गोलीबाट नेपाली नागरिकको हत्या हुँदा सरकार लाचार बनेको भन्दै छानविनको माग गरे ।
