बलिउड सुपरस्टार शाहरुख खानको करिअरमा सबैभन्दा महत्वपूर्ण फिल्म मानिन्छ दिवाना । यो फिल्मले उनलाई एकाएक स्टार बनाएको थियो ।
तर, कमैलाई थाहा छ, शाहरुखलाई यो फिल्म ‘दैवले’ जुराएको थियो । सुरुमा यो फिल्मका हिरो थिए अरमान कोहली । कोहली र दिव्या भारतीयलाई लिएर फिल्मको पोष्टरसमेत बनिसकेको थियो भने सुरुका केही दृष्यको सुटिङ समेत भएको थियो ।
तर, पारिवारिक कारणले कोहलीले यो फिल्म बीचमै छोड्नुपर्यो । उनले छोडेपछि निर्देशकले शाहरुखलाई साइन गराए । शाहरुखले यसअघि हेमामालिनीको फिल्म ‘दिल आशना है’ मा अभिनय गरिसकेका थिए । तर, आखिरमा सो फिल्मभन्दा पहिले दिवाना रिलिज भयो, जसले शाहरुखलाई चर्चाको शिखरमा पुर्यो ।
दिवानापछि उनले डर, बाजीगर जस्ता फिल्म हात पारे जसले उनलाई बलिउड सुपरस्टार बनाए ।
यता, दिवानाबाट पछि हटेका हिरो अरमान कोहली अहिले कता छन् कसैलाई पत्तो छैन । उनले यो फिल्म नछोडेका भए सायद शाहरुख जस्तै सुपरस्टार बन्ने थिए कि त ?
शाहरुखले हालै एउटा रियालिटी शोमा आफू सुपरस्टार हुनुको श्रेय कोहलीलाई दिएका छन् । उनले आफ्नो घरको भित्तामा कोहली र दिब्या भारती भएको दिवानाको पोष्ट राखेको समेत दावी गरेका थिए । -एजेन्सी
