३१ जेठ, काठमाडौं । नेपाली कांग्रेसका प्रदेश नम्बर २ का सांसद तथा केन्द्रीय सदस्यले त्यहाँ तेस्रो चरणमा चुनाव गर्न पार्टी सभापति समेत रहेका प्रधानमन्त्री शेरबहादुर देउवालाई सुझाव दिएका छन् । १, ५ र ७ नम्बर प्रदेशमा भने पूर्वनिर्धारित मिति असार १४ मै चुनाव गर्न सकिने उनीहरुले बताए ।
कांग्रेस नेताहरुले बुधबार प्रधानमन्त्रीलाई भेटेर चुनाव प्रदेश नम्बर २ को चुनाव सार्न आग्रह गरेका हुन् । ‘मधेसमा स्थिति असहज छ । राजपाले बन्द आहृवान गरेको छ’ नेता महेन्द्र यादवले भने, ‘अन्त १४ गते नै चुनाव गरे हुन्छ । तर, प्रदेश नम्बर २ मा तेस्रो चरणमा चुनाव गर्नुस् भनेर सुझाव दिएका छौं ।’
प्रदेश नम्बर २ मा असार अन्तिममा भएपनि चुनाव गर्न सकिने उनीहरुले बताएका छन् ।
तर, राजपाले संविधान संशोधन नभई चुनावमा आउँदैनौं भनेको छ नि भन्ने प्रश्नमा नेता यादवले भने, ‘२२ वटा स्थानीय तहको संख्या बढाउने सरकारको निर्णय कार्यान्वयन भयो भने राजपा चुनावमा आउने वातावरण बन्छ ।’
यसबारे सर्वोच्च अदालतमा मुद्दा विचाराधीन छ र, असार ४ गतेका लागि पेशी तोकिएको छ ।
