१८ असार, इलाम। इलाम नगरपालिकाको मेयरमा नेकपा एमालेका महेश बस्नेत दोस्रो पटक बिजयी भएका छन् ।
२०५४ सालमा पनि उनले इलाम नगरपालिकाको मेयर जितेका थिए । आइतवार साँझ मतगणना सम्पन्न हुँदा बस्नेतले ११ हजार ३३ मत ल्याएका छन् ।
उनका निकटतम प्रतिद्वन्द्वी नेपाली कांग्रेसका हिमालय कर्माचार्यले ९ हजार २६८ मत ल्याएका छन् । यसरी नै उपमेयरमा पनि एमालेकै सुशीला नेम्बाङले जितेकी छिन् ।
निकटतम प्रतिद्वन्द्वी नेपाली कांग्रेसकी चन्दा कार्कीलाई पराजित गरेकी छिन् । नेम्बाङले १० हजार ९४६ मत ल्याएकी छिन् । कार्कीले भने ९ हजार २५४ मत ल्याएकी छिन् । इलाममा जितेसँगै एमालेले बिजय उत्सव मनाएको छ ।
२० वर्ष अघि भएको स्थानीय निकायको निर्वाचनमा पनि बस्नेत र कर्माचार्यले मेयरमा प्रतिष्पर्धा गरेका थिए । ७३ मतले बस्नेतले कर्माचार्यलाई हराउँदै २०५४ सालमा पनि एक कार्यकाल इलाम नगरपालिकाको मेयर भएका थिए ।
कर्माचार्य कांग्रेसका जिल्ला सभापति पनि हुन् । उनी २०७० सालको संविधानसभा चुनावमा एमाले नेता झलनाथ खनालसँग पराजित भएका थिए ।
इलाम नगरपालिकाको वडा नं १ मा नेकपा एमालेका अम्बिका गौतम, २ नम्बरमा नारदप्रसाद प्रसाद लम्साल, ३ मा नेपाली कांग्रेसका तीर्थराज गुरुङ, ५ मा एमालेका ठाकूर श्रेष्ठ, ६ मा एमालेका माधवप्रसाद भट्टराई, ७ मा नेपाली कांग्रेसका नरेश श्रेष्ठ, ८ मा नेपाली कांग्रेसका होमबहादुर बस्नेत, ९ मा नेकपा एमालेका श्यामकृष्ण घिमिरे, १० मा नेकपा एमालेका रोमबहादुर लुङ्गेली, ११ मा नेपाली कांग्रेसका रबिन एक्तेन र १२ मा नेपाली कांग्रेसका लाखमान लिम्बूले जितेका छन् ।
देउमाई नगरपालिकामा पनि नेकपा एमाले जीतको नजिक पुगिसकेको छ । अहिलेसम्म इलामका १० स्थानीय निकाय मध्ये चार गाउँपालिका र एक नगरपालिकाको मत परिणाम आएको छ । सन्दकपुर, माइजोगमाई, चुलाचुली गाउँपालिकामा एमालले जितेको छ । भने माङ्सेबुङ्ग गाउँपालिकामा नेपाली कांग्रेसले जितेको छ । मत परिणाम आउन बाँकी रहेको सुर्योदय र देउमाई नगरपालिकामा एमाले अगाडि छ ।
यसरी नै इलामका स्थानीय तहको ८१ वडाहरु मध्ये ६६ वटा वडाको मत परिणाम आइसकेको छ । अहिलेसम्म वडाहरुमा नेकपा एमालको अग्रता रहेको छ । नेपाली कांग्रेसले मछ्याइरहेको छ । नेकपा एमालले हालसम्म ३५ वटा वडाहरुमा प्यानलै जितेको छ । नेपाली कांग्रेसले १२ वडाहरुमा प्यानलनै जितेको छ । १७ वटा वडाहरुमा नेकपा एमाले कांग्रेस र माओवादी केन्ऽले मिश्रति जित हात पारेका छन् ।
संघीय लोकतान्त्रिक राष्ट्रिय मञ्चले एक र राष्ट्रिय जनमुक्ति मोर्चाले एक वडामा प्यानलनै जितेको छ । माओवादी केन्ऽले भने एक वडाध्यक्ष र एक सदस्य मात्र अहिलेसम्म हात पारेको छ ।
देउमार्इ नगरपालिकामा पनि एमाले विजयी
यस्तै इलामकै देउमाई नगरपालिका पनि एमालेले जितेको छ । नेकपा एमालेका सुर्यप्रसाद पोख्रेलले विजयी भएका छन् ।
उनले ७०२ मत अन्तरले नेपाली कांग्रेसका होम दुलाललाई पराजित गरेका हुन । पोख्रेलले ७ हजार ३४७ मत प्राप्त गरेका छन् । उनका निकटतम् प्रतिद्वन्द्वी कांग्रेसका दुलालले ६ हजार ६४५ मत प्राप्त गरेका छन् ।
यसरी नै उपमेयरमा पनि एमालेकी पविमाया राईले जितेकी छिन् । उनले १५ सय ९७ मतले नेपाली कांग्रेसकी सुर्यमाया राईलाई पछि पार्दै जित हात पारेकी हुन् । एमालेकी राईले ७ हजार ९८७ मत र कांग्रेसकी राईले ६ हजार ३९० मत प्राप्त गरेकी छिन् ।
