केही दिन अगाडि मात्र नायक अजय देवगण आफू अभिनित चलचित्र ‘बादशाहो’को प्रमोशनका लागि चर्चित कमेडी शो ‘द कपिल शर्मा शो’मा पुगे । तर, यसका संचालक कमेडियन कपिल शर्माको स्वास्थ्य अवस्थाका कारण शो सुटिङ नै हुन सकेन । अजय त्यसै फर्किए ।
नायक साहरुख खान पनि चलचित्र ‘जब ह्यारी मेट सेजल’को प्रमोशनका क्रममा कपिलको शोमा पुगे । तर, कपिलले स्वास्थ्य अवस्थाका कारण शो सुटिङ गर्न नसकेपछि साहरुख यसै फर्किए ।
कमेडियन कपिल शर्माको स्वास्थ्य अवस्था विग्रिएपछि अब सोनी टेलिभिजनले ‘द कपिल शर्मा शो’ बन्द गर्ने निर्णय गरेको छ । स्वयंम कपिलले पनि यो कुराको पुष्टी भारतीय मिडियासँग गरेका छन् । उनले भनेका छन्-‘स्वास्थ्य भन्दा ठूलो अरु केहीपनि होइन । यसैले, हामी केही समयको ब्रेक लिदैछौ । सोनी टेलिभिजनले मेरो समस्या वुझेकोमा धन्यवाद दिन चाहन्छु ।’
कपिलले निर्माण तथा अभिनय गरेको चलचित्र ‘फिरङ्गी’ पनि रिलिज हुने क्रममा छ । चलचित्रको प्रमोशनका क्रममा प्रेसर हुने वुझेका कपिलले तत्काल भने शो बन्द गर्ने निर्णय गरेका हुन् ।
सोनी टेलिभिजनले कपिलका पुराना शोहरु नयाँ समयमा प्रशारण गर्ने तयारी समेत गरेको छ ।
